Sec. Alcala: 40% budget sa DA gibubo sa Mindanao karong 2012

NABUNTURAN, Compostela Valley Province, May 17 – Dili na gyod gamay, apan labing dakong budget sa Department of Agriculture (D.A.) maoy gibubo sa National nga gobyerno ilalom sa pamunuan ni Pangulong Aquino dinhi sa tibuok kapupud-an sa Mindanao sa 2012 aron maseguro ang pas paspas nga paglambo niini.

Matud ni D.A. Secretary Proceso Alcala atol sa iyang pagbisita sa Compostela Valley niadtong Mayo 15, nga miabot gyod sa 40% sa kinatibuk-ang Budget sa Department of Agriculture maoy iyang gigahin sa Mindanao karong tuiga ug dili na magmantenir ang mga katawhan sa Mindanao  sa gamay kaayong budget nga mokabat lang sa 12% ngadto sa 15% sa nakalabayng mga katuigan.

Si D.A. Secretary Alcala ug mga kauban ang miabot sa kapitolyo 1:30 sa hapon niadtong Mayo 15, ug sa iyang paghiabot siya gihatagan sa probinsiya ug usa ka Grand Welcome diin mao gyoy misugat kaniya sila si Gov. Arturo “Chiongkee” Uy, Cong. Maricar Zamora, Cong. Rommel “Bobong” Amatong, ang napulo ka mga Municipal Mayors, mga SP Members, ug ang mga dagkong opisyal sa probinsiya.

Sa iyang paghiabot gipahigayon ang usa ka working lunch, ug samtang sila naniudto ilang gihmo ang usa ka meeting diin atol niini ang mga Municipal Mayors nag-iyahay pag-submit sa ilang tagsa-tagsa ka mga project proposals nga giuyonan usab dayon sa D.A. Secretary.

Human sa mokabat usa ka oras nga pagpangaon ug kolokabildo milahos sila didto sa Assumption College of Nabunturan Gymnasium ug didto opisyal nga giproklamar mismo ni D.A. Secretary  Alcala ang mokabat 1,060 ka mga mangunguma nga bag-o lang migradwar sa Farmer Field School ni Gov. Arturo “Chiongkee” Uy atol sa gihimong mass graduation ceremony.

Panahon usab sa kapin usa ka oras nga programa personal nga gitunol ni Secretary Alcala ngadto ni Gov. Uy ang pipila sa mga  interventions sa agrikultura  nga gibubo sa D.A. sa probinsiya nga naglakip sa P13.325 milyones nga RCDG Bridge diha sa Lower-Ulip Monkayo; sa 24 units nga power Sprayer; sa P2 milyones nga Diversion Dam(DD) sa Brgy. tubo-tubo, Monkayo; sa P2.5 milyones nga Spring Dev’t Project sa Brgy. Cambaratic, Mabini; sa P1.7 milyones nga DD sa Brgy. Mipangi Nabunturan; sa 3 ka tag P180 mil nga Multi-Purpose Drying Pavements sa Mawab, Gabi Compostela, ug Kidawa Laak; sa P650 mil nga flatbed Mechanical Dryer sa Brgy. Libasan, Nabunturan; sa P850 mil nga 4 wheel Drive Farm Tractor, sa 3-units nga tag 300 mil nga Power tiller with bed maker; sa 3,000 ka semilyang prutas, ug uban pa. (IDS-Comval/Gilbert Cabahug)