Paglaum mi gitib sa bag-ong GK Village sa Mabini

Compostela Valley Province – Ang pag-antos sa dugayng panahon sa pamuyo nga puno sa mga kabalaka tungod sa tulo sa mga atop ug pagkatay-og sa huyang nga panimalay sa higayon nga duawon sa kusog nga pagkuso-kuso sa  hangin panahon sa ting-ulan natapos human nga gitunol sa ilang pamilya ang usa ka kongkreto ug pinturadong balay diha sa  “Ang Bag-ong Malambuong Mabini Uswag GK Village” sa Brgy. San Antonio atol sa gihimong turn-over.

Matud sa taga-Brgy. Cuambog nga si Herminigilda Romagos nga dugay nang panahon puno gyod siya sa dakong kabalaka uban ang iyang upat ka mga anak, sa posibleng pagkapalid sa karaan na kaayo nilang  pinuy-anan nga hinimo lang sa  kawayan ug sa uban pang scrap nga mga materyales nga giatopan lang ug nipa duol sa baybayon.

Dunay higayon matud pa nga siya makuratan, ug sa kalit lang mahigmata sa higayon nga dunay kusog  kaayo nga  paghuros sa hangin labi na panahon sa taob ug dunay mahitabong subasko nga inubanan sa kusog kaayo nga mga pag-ulan.

Ang pamilyang Romagos maoy usa niadtong mga palarang pamilya nga nakabenepisyo sa mokabat 28 ka kongkreto ug pinturado nang mga balay nga libreng gitunol sa probinsiya ug sa LGU Mabini atol sa Turn-over Ceremony niadtong Mayo 28,2012.

Ang turn-over Ceremony gisugdan sa usa ka Santos nga Misa, ug human niini mao ang pagbendisyon sa mokabat 28 ka mga balay nga gitabangan pagtukod sa mga katawhan atol sa 9th USWAG GK Bayani Challenge niadtong Mayo 8-14,2012.

Human sa Blessing, ang mga GK Beneficiaries nga gitawag ug Kapit-Bahayan gihatagan sad ug usa ka dakong “Starter Kit” nga gisudlan ug mga pagkaon ug kagamitan sa balay nga libreng gitunol kanila sa mga empleyado sa probinsiya ug sa LGU Mabini ilalom sa pagpanguna ni Mayor Hadji Amir Muñoz.

Matud ni CADS Chief Executive Assistant Raul Timogtimog-USWAG GK Action Officer, nga gawas sa napulo ka mga balay nga gitunol ni Gov. Uy sa bag-o nahumang USWAG GK Village laoman sad ang lain-laing livelihood projects nga ibubo sa probinsiya pipila ka adlaw ang moabot. Kini maoy mahidugang sa Nipa, ug sa vegetable garden sulod mismo sa bag-o namugnang community. (gilbert cabahug/ids comval)