Dugang 40 trabahanteng Comvaleño migradwar sa Galing Mason Training

NABUNTURAN COMVAL- Dugang 40 na sad ka mga Comvaleño nga construction workers ang migradwar sa bag-o nahumang Skills Training sa Masonry Works kon mga trabaho sa semento sa Construction, ug matud ni Gov. Uy nga kabahin sa ilang graduation ceremony niadtong May 9 mao ang paghatag kanila sa TESDA ug Certification nga National Competency (NC) 1.

Ang gihatag sa TESDA kanilang certification nga NC 1 maoy kalig-onan nga sila duna nay kahanas sa mga trabahoon sa semento, ug mas dako na ang ilang suweldo kompara sa usa ka yano kon ordinaryong construction worker lamang.

Hands-on sa usa ka semanang Training ang pipila sa mga balay nga apil sa mokabat 28 nga gitabanangan ug tukod sa mga volunteer builders sa Brgy. San Antonio, Mabini panahon sa 9th Bayani Challenge 2012.

Matud ni Provincial CTEC Bob Mirasol nga “Ang Galing Mason Training Program” ni Gov. Uy gisugdan sa nakalabayng 2009 nga dunay 80 ka mga partisipante diha sa Brgy. Kinuban sa Maco, ug  ang 2nd batch nahitabo sa Oktobre 2009 gihapon. Duna gihapon kiniy 80 ka mga partisipante, ug ang site sa training mao ang USWAG-GK CSAP Village diha gihapon sa Brgy. Kinuban.

Migradawar sad ang laing 75 niadtong Abril 2011 nga nakahuman sa laing training didto sa S.O.P. USWAG GK Village sa Compostela, ug niadtong Abril 20 dunay 50 nga migradwar sa usa ka upgrading training.Sa gihimong upgrading dunay  25  nga  nahatagan ug certification nga NC-2.

Samtang ang laing 25 nga certified NC 2 niadtong nakalabayng tuig gitakdang hatagan sad sa TESDA ug certification nga NC3. (gilbert cabahug/ids comval)