ni Noel Baguio
TAGUM CITY, Davao del Norte, May 9 – Giawhag ni Governor Rodolfo P. del Rosario ang mga turista sa pagpahimulos sa nahibiling pila ka semana sa summer pinaagi sa pagsuroysuroy sa mga tourist attractions sa Davao del Norte.
Atul sa paglusad sa proyektong Beat for Summer Heat 2012 didto sa Abreeza Mall, Davao City sa milabay nga semana, giimbita sa gobernador ang mga turista sa pagbisita sa mga nindot nga destinations sa lalawigan.
Apil niini ang white beaches sa Island Garden City of Samal ug ang Monfort Bat Sanctuary sa Babak; ang mga kweba ug busay sa San Isidro, New Corella ug Kapalong; ang halapad nga banana plantations sa Panabo ug Sto. Tomas; ang award-winning best practices sa B.E. Dujali; and historic Ising Monument sa Carmen; ang Madgao River sa Asuncion ; ang daghang festival sa Tagum City ; ug ang datu nga cultural heritage sa Talaingod, ug uban pa.
Gi-display ang maong mga attractions, uban sa mga promotions packages ug nagkalainlaing produkto sa lalawigan didto sa Beat for Summer Heat 2012 hangtud May 22, 2012.
Ang maong kalihokan gipahigayon ubos sa One Summer Fun, One Davao project, nga gi-organisa sa One Davao Tourism Officers Association (ODTOA), sa pakig-alayon sa Department of Tourism (DOT)-XI.
Nagsugod ang proyekto sa ODTOA sa milabay nga April 14, 2012 sa tinguha nga i-promote ang summer activities sa nagkadaiyang tourist destinations sa tanang lalawigan ug dakbayan sa Davao Region. (PIO-DavNor/Noel Baguio )
No comments:
Post a Comment