Compostela Valley Province - Dili na bag-o kanato ang kinabuhi sa mga Superheroes sama nilang Superman, Spiderman, Batman, Ironman, Incredible Hulk, Capt. Barbel ug uban pa, tungod kay sukad sa atong pagkabata daghan kanato nahimong kabahin sa atong kinabuhi ang  mga pangandoy nga kita usab sama kanila makahimo sa mga butang imposible diha sa pagsumpo sa mga dautan sulod  sa gingharian sa atong mga damgo.
 
Ingnon ta nga ang sugilanon sa mga Superheroes para lang sa mga bata, apan ngano kaha nga bisan kita nga hamtong na mopili gihapon pagtan-aw sa salida sa mga Superheroes aron nga sa makausa pa atong handumon ang panahon sa atong kalinghod nga puno sa mga damgo, sa mga pangandoy, ug tingusbawan diha sa lain-laing klase sa mga panimpalad sa kinabuhi diin sagad niini kita maoy bida?
 
Apan gi-klaro karon ni Gov. Arturo “Chiongkee” Uy nga ang usa sa mga labing importanteng hiyas ug kinaiya sa sugilanon sa mga superheores nga sagad natong makita mao nga sila nagmalampuson sa ilang tinguha nga masumpo ang mga dautan ug kriminalidad tungod kay duna silay mga kauban ug katabang.
 
Sa iyang bahin gipasabot sa Gobernador ang mga excellent performance sa service delivery nga nahimo sa probinsiya ilalom sa iyang liderato, ug matud pa niya nga ang gituhoan kanhi sa kadaghanan nga imposible nahimong posible sa iyang panahon. Kini tungod sa mga empleyado nga hugtanong mitabang ug misuportan kaniya pinaagi sa sobrang oras nilang pagtrabaho aron mahatud sa mga katawhan ang gikinahanglan nilang serbisyo sa gobyerno.
 
 Tungod natunong sa adlawng Dominggo, Hulyo 22 nga maoy petsa sa Birth Day ni Gov. Uy, ang mga empleyado sa probinsiya advance nga nagsaulog niini diha sa kapitolyo niadtong Biyernes pinaagi sa pagdalit kaniya ug  usa ka Superhero Party nga gitawag ug “The Amazing Arturo at 60.” Kini giapilan sa mga empleyado ug  sa mga kabataan nga maoy naghimo sa talagsaon ug mabulokong selebrasyon nga puno sa kalipay, katawa, ug hudyaka.
 
Gihulagway sa maong Birth Day Party pinaagi sa gidalit nga awit ug mga sayaw ang makadaning kinabuhi sa unom ka mga Superheroes nga gidapigan sa gatusang mga empleyado nga naggrupo base sa ilang departmento kauban ang mga kabataan.
 
Ang superhero nga si Spiderman maoy gipili sa mga empelyado sa Provincial Governor’s Office;  ang mga empleyado diha sa GSO maoy nagpili kang Incredible Hulk; si Superman maoy iya sa PAGRO, sa Motorpool, ug sa Accounting; si Ironman maoy gipili sa PTO, sa PLO, ug sa Assessor; si Batman maoy gipili sa PSWDO, sa Budget, sa PPDO, ug sa SP-VGO; ug si Capt. Barbel maoy gipili sa PEO ug PEEMO.(gilbert cabahug/ids comval)