Hiniusang lihok alang sa industriya sa saging

DAVAO CITY, May 30 (PIA) – Ang Department of Agriculture, Department of Trade and Industry ug Department of Foreign Affairs ang naghiniusa alang sa paghimo sa usa ka presentasyon alang ngadto sa mananumay og saging nga naapektuhan pag imposar sa China sa striktong rekesitos sa kwarantina.

Gihulagway ang maong pakiglambigit nga usa ka gitawag og Filipino team effort, si DA Assistant Secretary Salvador Salacop nagkanayon nga kining maong gitawag og package presentation ang ipakita ngadto kang Presidente Benigno III.

Ang tulo ka departamento ang mulihok unya diha sa pag mugna og bag-ong merkado, pagmonitor sa mga maayong agricultural practices ug ang pag upgrade sa export facilities.

Kauban sa mga nailhang merkado mao ang Russia partikular ang port of Vladivostok nga nagpadayag sa ilang interes sa saging nga gikan sa Mindanao.

Kung ikonsiderar unya ang gilay-on sa maong nasud nga mahimong angayan nga merkado, si Salacop nagkanayon nga ang Vladivostok duha lamang ka oras kung biyahe-on gikan sa China.

Lain usab nga posibleng merkado nga gilantaw karon mao ang Iran nga sa kasamtangan pa nga gitun-an.

Bisan tuod ang Iran nag atubang sa usa ka sanction, apan ang produkto sa pagkaon susama sa saging ang wala malakip sa langyaw nga sanction. 

Siya nagdugang usab nga ilang gitun-an ang usa ka counter-trade proposal nga kung diin ang saging mamahimong ibaylo ngadto sa lana tungod sa ang langyaw nga kwarta ang nihit partikular na ang US dollar diha sa Iran tungod sa giimposar nga embargo.

Usa ka trade mission ang kasamtangang giplano alang ngadto sa Iran karong Hunyo matud pa ni Salacop, ug usa unya nga pagahisgutan mao ang pag export sa saging.

Samtang gawas sa pagpangita og merkado alang sa export, ang DA naglantaw sa pagbag-o sa mga export nga pasilidad ngadto sa small growers.

Sila usab naglantaw sa mga pamaagi aron ipakita nga mga maguumang Filipino ang nagahimo ug nagpatuman sa gitawag ug good agricultural practices.

Si Salacop nagkanayon nga bisan pa sa gitawag nga China’s crackdown sa saging sa Pilipinas dili usab nila matago ang dagong merkado.

Siya nagdugang nga ang nasud usa ka net importer sa produktong pang agrikultura gikan sa China. Samtang ang nasud naga exportar taga tuig ug $180-million ngadto sa China kung diin $70-million an gikan sa saging.

Samtang ang nasud ang naga angkat sa kantidad nga $350-million nga agricultural commodities.

Si DA assistant secretary nagkanayon nga kasagaran sa saging nga gipadala ngadto sa China ang “Class B” nga saging ug dili basta-basta mabaligya ngadto sa langyaw nga nasud nga naanad na nga nagadawat sa “Class A” nga saging.

Si DTI-XI Regional Director Marizon Loreto niining bag-o lamang nga pakighinabi nagkanayon nga ilang gilantaw ang pagdevelop og merkado alang unya sa lain-laing produkto sa saging susama sa banana chips, banana flour, banana ketchup ug ang banana fiber.

Si Loreto nagsulti nga ang fiber sa saging ang ginahimo og usa ka fashion accessory nga adunay potential nga pagkinahanglan diha sa merkado sa Hapon kung diin ang fiber niini ginahimo nga usa ka fashionable shawl nga ginasuot sa mga babaeng hapon. (PIA-11/Albert D. Cahilog)