Convergence suportado sa private sector

ni Noel Baguio

Gidayeg ni Governor Rodolfo P. del Rosario ang suporta sa pribadong sector sa programang Davao del Norte Convergence for Peace and Development.

Matud niya ang pakighiusa usab sa private sector sa convergence maoy nakatabang aron magpadayon ang kalampusan sa mga medical and social mission nga ginapahigayon sa  mga lagyo ug pobreng barangay sa probinsya matag adlaw sa Biyernes.

Ang mga pirbadong indibidwal ug kompanya mitunol sa ilang tabang agi’g pagpatuman sa ilang corporate social responsibility. Misuporta kini sa public-private partnership nga programa sa gobernador ubos sa iyang P.E.O.P.L.E agenda.

Mapasalamaton si del Rosario sa pipila ka mga private medical practitioners ug uban pang professionals nga gahatag sa ilang libreng serbisyo sa mga medical ug social missions.

Apil usab ang Planters Products, Inc. (PPI) sa gidayeg sa gobernador tungud sa pagdonar niini ug 250 ka bags sa hybrid yellow corn seeds aron ipang-apud-apud sa panahon sa convergence. Mihatag ang Makati-based agri-chemical company pinaagi sa efforts ni former Samal Vice Mayor Orly Amit.

Biyente-Sinco ka mga sako sa maong corn seeds ang gi-distribute ni Del Rosario sa mga mag-uuma atul sa ika-12 nga convergence mission sa Barangay Pinamuno sa Lungsod sa San Isidro sa milabay nga May 25, 2012.

Duna nay 50 ka sako sa mais ang gipang-apu-apud atul sa mga outreaches  sa New Corella ug Sto. Tomas, samtang laing 50 pa ang gikatahong itunol sa lungsod sa Talaingod.  

Ang mga miyembro usab sa Progressive Gays and Lesbians Association of Davao del Norte (Pro-GLAD) walay pu-as usab nga mitunol sa ilang free hairstyling services matag convergence.