Comval PLGU ug Selecta nag-partner sa Ube Production sa GK Sites

NABUNTURAN COMVAL- Ilalom sa “Bayan-Anihan, Goodbye Gutom Program” sa Agrikultura nga gipatuman ni Gov. Arturo “Chiongkee” Uy sa Compostela Valley, gisugdan karon sa probinsiya ang “Ube Production” sa mga GK Villages pinaagi sa pagpakig-partner sa kompanyang Selecta nga maoy usa sa labing sikat nga Ice Cream Company sa nasud.

Matud ni Assistant PAGRO Chief Manolo Serafin Cayme – natudlong Chairman  sa Ube Production ug kasamtangang Team Leader sa Bayan-Anihan Program ni Gov. Uy sa Comval, nga pinaagi sa gisugdang Ube Production makalingwas gyod sa kalisud ang mga katawhan tungod sa dakong kitaon niini gawas nga kini usa ka iladong pagkaon nga pwedeng ihulip sa bugas.

Niadtong May 10 gipailalom sa usa ka techno-demo ni Dr. Ayds Adalla-trainor, ang mokabat 17 ka mga beneficiaries (nga maoy 1st batch) sa PBB USWAG-GK Village sa New Bataan.

Ilang kauban sa training ang unom ka MAGRO Personnel sa New Bataan ug laing upat ka mga staff sa Provincial Agriculturist Office(PAGRO) sa Comval. Si Dr. Adalla maoy kanhi Dean sa UP College of Agriculture nga karon usa na sa mga dagkong haligi sa Bayan-Anihan sa Gawad Kalinga.Sa pagkaudto, ang mga partisipante gidala didto sa Brgy. San Antonio Mabini tungod kay didto ang Schedule sa launching ug MOA Sigining sa maong programa.

Tuyo niini matud ni Cayme mao nga mahibal-an sad sa mga taga-Mabini nga sa dili madugay sila usab makabenepisyo sa maong programa sama sa mga taga-New Bataan nga mag-“goodbye gutom” na sa moabot nga mga  adlaw.Ubos sa gipirmahang MOA ang Kompanyang Selecta maoy mopalit sa tanang abot nga UBE diha sa GK Site.

Ang mga GK Homeowners maoy mag-atiman sa Ube gikan sa pagtanom hangtud sa pag-harvest ug panahon niini duna silay suweldo nga ibayad kanila sa kompanyang Selecta.

Mipirma sa MOA sila si Executive Assistant Macario Humol nga maoy nagrepresentar kang Gov. Uy, si Mayor Lorenzo Balbin, si Mr. Rene Rieta-GK Southern Mindanao Head, si Dr. Tante Adalla sa Bayan - Anihan, ug ang Chief Eexecutive Officer (CEO) sa kompanyang Selecta. (gilbert cabahug/ids comval)