Barangay Katualan nakabaton ug linya sa kuryente

Luyo sa paningkamot nga mapalambo ang kondisyon sa mga lugar nga walay kuryente, ang Davao Light and Power Company (DLPC) pinaagi sa ilang Corporate Social Responsibility (CSR) nag-inagurar sa bag-ong na-instolar nga linya sa  kuryente didto sa Barangay Katualan niadtong Abril 27, 2012.

Nahimutang ang Barangay Katualan 25 kilometro gikan sa sentrong syudad sa Panabo ug niining higayona ang maong barangay nakatagamtam usab sa nagkadaiyang proyekto ni City Mayor Jose L. Silvosa, Sr. nga mao ang pagtukod ug bag-ong lawak tulonghaan ug pagpang-ayo sa kadalanan ug electrification project sa DLPC nga bag-ohay lang gitaud.

Gipamulong ni City Administrator Henry M. Esparagoza atubangan sa mga lumolupyo sa Katualan ug matud niya:

“Sugod karong adlawa dili namo maglisud kung manlakaw panahon sa kagabhion kay aduna nay suga ug hayag na ang inyong kadalanan tungod sa Social Corporate Responsibility sa Davao Light and Power Company sa ilang pagtagad, paglantaw sa basic needs sa matag panimalay nga mao ang kuryente nga magpasiga sa inyong suga ug magpaandar sa inyong radyo, telebisyon ug uban pang mga gamit”.

“Prayoridad sa lokal nga panggamhanan sa Panabo nga matauran ug linya sa koryente ang suok nga dapit sa barangay, busa kami nagpasalamat kay Mayor Jose L. Silvosa, Sr. ug kay Besi Mayor James G. Gamao ug sa ubang mga opisyales sa syudad nga nagpaluyo niining proyekto”, matud sa representante ni Brgy. Kapitan Lauriano Dela Torre (tua sa kaulohang Maynila) nga si Honorable Jamsodin M. Damada.

Si Honeybee Suyong nga taga Prk. 1 Brgy. Katualan, dako usab kaayo ang iyang pasalamat nga miabot na gyud sa ilang dapit ang dugay na nilang gihamdong sugang dagitabnon.

Mismo ang representante ni Mayor Silvosa nga si City Administrator Esparagoza ug opisyales sa barangay ang nanguna sa ceremonial switch-on inubanan sa representante ni Besi Mayor James G. Gamao nga si Edgar Gerale, FO3 Michael Alfarez sa BFP, DLPC Branch Manager Engr. Reynold Felix ug Engr. Nemar Jumarito  sa Integrated Institute of Electrical Engineer nga naghatag og oryentasyon sa insaktong paggamit sa koryente, ilabi na sa pagdaginot ug paglikay sa sunog. (Erwin Cubio & Bryan Linde-CIO Panabo.)