Palasyo subling nanawagan sa publiko nga mopatuo sa otoridad atol sa pagbisita sa Santo Papa

Subling nanawagan ang Palasyo sa katawhan nga mopatuo sa otoridad, atol sa lima ka adlaw (5 days) nga pagbisita ni Pope Francis sa mga siyudad sa Manila ug Tacloban.

“Dili kini mahimo sa gobyerno nga mag inusara lamang. Busa nakigbagat kami sa mga taga simbahan ug sa nagkalain-laing grupo sa pribadong sektor,” matud pa ni ni President Benigno Aquino III, nga gikutlo ni Secretary Herminio Coloma, Jr., sa Presidential Communications Operations Office (PCOO).

“Kung magtinabangay ang tanan, makab-ot nato ang atong gipangandoy nga usa ka malinawon ug mabungahong pagbisita sa atong Santo Papa,” si Coloma miingon.

Matud pa usab sa Secretary nga ang gobyerno dili mokompiyansa ug nga gihunahuna na niini ang tanang posibleng senaryo.  

"Sa daku nga panagtigum, daku usab ang posibilidad nga bisan sa kagamay sa komosyon mahimong mosangput kini sa dakung kagubot o sa “stampede” kun pagdinaganay, diin adunay mga tawo nga matamak-tamakan," matud ni Coloma sa a interbiyu sa dzRB Radyo ng Bayan.

Busa iyang gi-awhag kadtong mo-apil sa mga kalihokan sa Luneta ug sa Tacloban sa pagsunod sa mga instruksiyon sa mga marshal, usher, enforcer ug kapulisan. (PIA)