Malnutrition Rate sa Mawab 1.12% lang sa 2014

Compostela Valley Province – Miabot na lang karon sa 1.12% ang Malnutrition Prevalence Rate sa Mawab nga maoy nag-unang lungsod sa tibuok Comval Province nga pinakaubos ang ihap sa mga batang malnourished.

Ang pinakaulahing report sa opisina ni Provincial Nutrition Council Chair Gov. Arturo “Chiongkee” Uy nagtug-an nga sa 2014 ang Mawab aduna ray 62 ka mga batang underweight ug wala na gyo’y severely underweight human ang regular nga pagpanimbang aron sayron ang nutritional status sa mga kabataan sa lungsod nga nag-edad og 0-71 ka bulan.

Sa milabayng 2012 ang Mawab nag-zero sa sa mga batang severely underweight human nga kining lungsura maoy gitumong sa 3^rd Batch sa   “Adopt a Child Program”  nga hugtanong giimplementar sa probinsiya.

Sunod sa Mawab ang Nabunturan nga naa lang sad sa 2.41% ang Malnutrition Prevalence Rate, ug nagsunod usab niini ang Monkayo nga duna ray 3.08% Malnutrition Prevalence Rate ug ang Maco nga duna ray 3.37% Malnutrition Prevalence Rate.

Ang ubos kaayong Malnutrition Prevalence Rate niining mga lungsura ug sa uban pang mga lungsod dako’g natampo sa kusog usab kaayo nga pag-us-os sa Malnutrition Prevalence Rate sa tibuok Comval Province nga naa na lang karon sa 4.68% gikan sa 5.14 % sa milabayng 2013.

Nahitabo kini human ang lain-laing Nutrition Interventions ubos sa mas gipalapdang Nutrition Program nga gipatuman sa liderato sa probinsiya sa pagpanguna nila ni Gov. Uy, Vice Gov. Manuel “Way Kurat” Zamora, ug Senior Board Member Tyron Uy. (gilbert cabahug/ids comval)