Dul-an 11,000 pasyenteng Comvaleño natambalan sa libreng Health Outreach sa probinsiya

Compostela Valley Province – Miabot gyod sa 10,811 pasyenteng Comvaleño ang natambalan nga libre sa mga mananambal sa Provincial Health Office atol sa nagsunod-sunod nga health outreach sa probinsiya sa milabayng 2014.

Labing daghan sa mga natambalan nga libre nahitabo sa 1^st Quarter niadtong milabayng tuig nga miabot sa 5,836 mga pasyente nga natambalan nga libre diha sa lain-laing mga kabaranggayan sa onse ka mga lungsod sa Comval Province.

Libre ang konsultasyon, libre ang laboratory services, ug dunay libreng mga tambal ug libreng Multi-vitamins nga gipanghatag sa tanang miapil sa kada  adlawng Health Outreach bisan kadtong mga dili masakiton.

Gisulti mismo ni PHO Chief Dr. Renato Basanez nga kabahin sa nagpadayong Preventive Aspect sa Health Services Delivery sa liderato sa probinsiya sa pagpanguna nila ni Gov. Arturo “Chiongkee” Uy, Vice Gov. Manuel “Way Kurat” Zamora, ug Senior Board Member Tyron Uy ang mas gipakusog nga Medical Health Outreach Program  pinaagi sa mga Staff sa PHO nga mitunol sa libreng Medical ug Dental Services ngadto sa mga katawhan pinaagi sa Hospital on Wheels (HOW) nga sa matag karon ug unya nagbalhin-balhin sa mga kabaranggayan diha sa onse ka mga lungsod.

Matud pa usab niya nga gipaningkamotan karon sa liderato sa probinsiya nga masulod gyod sa nagpadayong Health Outreach Program kadtong mga katawhan nga diha nagpuyo sa lugar nga giilang Geographically Isolated and Depressed Area (GIDA).

Partners sa probinsiya sa pagtunol niini ang Department of Health(DOH) pinaagi sa DOH Regional Office XI ug ang Municipal LGUs. (gilbert cabahug/ids comval)