Sa Comval: Hapit 10,000 nakabenepisyo sa libreng ibot og ngipon

Compostela Valley Province – Apil sad sa mga labing mahinungdanong serbisyo sa panglawas nga gitunol sa Comval Province  pinaagi sa mga Staff sa Provincial Health Office gamit ang Hospital On Wheels (HOW) atol sa nagsunod-sunod nga Health Outreach mao ang libreng pagpang-ibot og ngipon, ug niadtong milabayng 2014 miabot gyod sa 9,644 mga pasyenteng Comvaleño ang naserbisyohan sa probinsiya niini diha sa mga kabaranggayan sa onse ka mga lungsod.

Ang daot nga ngipon usa sa mga problema sa panglawas nga nakahatag ug dakong kahasol sa mga katawhang Comvaleño labi na nga diha sa pribadong mga tambalanan kadtong nag-antos sa kasakit tungod niini mahimong makagasto og gikan P350.00 hangtud sa P600.00. Wa pay labot ang magasto sa iyang pagbiyahe labi na ang diha sa lagyong mga lugar.

Sa Comval Province adunay daghang mga kabataan nga tungod sa daot nga ngipon mihinay ang performance diha sa klase kay kulang sila sa tulog, kulang sa pahulay, dili maka-concentrate, labi na nga dili makatarong pagpaminaw sa ilang mga magtutudlo.

Rason nga ang liderato sa probinsiya sa pagpanguna nila ni Gov. Arturo “Chiongkee” Uy, Vice Gov. Manuel “Way Kurat” Zamora, ug Senior Board Member Tyron Uy milihok aron maatiman ang mga katawhan nga dunay problema niini ilalom sa mas gipalapdan ug mas gipahugtang Preventive Aspect sa Health Services Delivery.

Gisulti mismo ni PHO Chief Dr. Renato Basañes  nga sa pagtubag niining problemaha gipakusog sa probinsiya ilalom sa preventive aspect sa health services delivery ang serbisyo nga libreng pagpang-ibot og ngipon diha sa mga kabaranggayan panahon sa gipaspasang health outreach gamit ang Hospital On Wheels nga sa matag karon ug ug unya magbalhin-balhin diha sa mga kabarangayan.

Matud pa usab niya nga gawas libre ang serbisyo sa mga Dentista, gihatagan sad sa libreng mga tambal kadtong  mga naserbisyohan sa walay bayad nga  pagpang-ibot og ngipon. Partners sa probinsiya sa pagtunol niini ang Department of Health (DOH) pinaagi sa DOH Regional Office XI ug ang Municipal LGUs. (gilbert cabahug/ids comval)