Tyron: “Landslide Victory” tugbangan sa tinud-anay nga serbisyo sa mga katawhan

by Gilbert M. Cabahug

COMPOSTELA VALLEY PROVINCE-----Gipasalig karon ni Board Member Elect Tyron Uy nga iya gayong  pagatugbangan sa tinud-anay nga serbisyo ang “Landslide Victory” nga gihatag kaniya sa mga katawhan sa milabayng Mayo 10, 2013 nga piniliay.

Atol sa iyang opening Speech sa malampusong Maiden Session sa 6th Sangguniang Panlalawigan nga gidumala ni Vice Gov. Manuel “Way Kurat”Zamora diha sa SP Session Hall sa Kapitolyo niadtong Hulyo 3, maoy sulti ni Tyron nga karon mao na ang tukmang panahon sa pagbalos sa mga katawhang Comvaleño nga misalig kaniya pinaagi sa paspas ug tinud-anay nga public service delivery.

Apan iyang giklaro nga dakog natabang sa nakab-ot nga landslide victory sa Team ComVal ang ilang panaghiusa, determinasyon, ug panaghiglaay nga maoy usa sa mga timaan sa ilang pagkasinsero sa serbisyo publiko nga nakita ug gituhoan sa mga katawhan.

Si Tyron nagsugod sa serbisyo publiko sa Compostela Valley niadtong tuig 2011 human nga siya maoy gitudlong Provincial Sports Coordinator ni Governor Uy, ug sa  2012 siya sad maoy gitahasan sa iyang amahan sa School Chairs Distribution kun pagpanghatag ug mga lingkoranan sa pampublikong mga tulunghaan sa elementarya ug sa sekondarya diha sa mga kabarangayan sa onse ka mga lungsod sa Comval

Tungod sa iyang mga maayong nahimo ug nakitang kadasig sa pagserbisyo sa katawhan, daghan sa iyang supporters ug mga kahigalaan ang nag-awhag kaniya sa  pagpalapad sa  iyang pagpanerbisyo pinaagi sa pagsalmot sa Mayo 13, 2013 Election nga diin maoy iyang gisaad sa katawhan nga pipila sa iyang focus sa pagpanerbisyo ang edukasyon, Sports, ug ang kabatan-onan.

Sa iyang pagsalmot sa May 13, 2013 nga piniliay siya gi-welcome sa mga katawhan pinaagi sa makabungog nilang boto nga miabot gayod sa 94,313.  Kini ang pinakataas nga boto nga nakuha sa usa ka SP Member base sa Final Official Result nga gipahibalo ni COMELEC Election Supervisor Atty. Jennifer Ponpon Ancla diha sa Kapitolyo niadtong Mayo 16, 2013.  Kini  atol sa gihimong Proclaimation of winners sa COMELEC sa mga mananaug nga Liberal Party Provincial ug Congressional Candidates sa Comval.  (Gilbert M. Cabahug, ids-comval)