ComVal SP giaprobahan ang bag-ong “House Rules” atol sa Maiden Session

by Gilbert M. Cabahug

 COMPOSTELA VALLEY PROVINCE-----Pinaagi sa malampusong Maiden Session sa 6th Sanggunian ilalom sa bag-ong pangulo nga si Vice Gov. Elect Manuel “Way Kurat” Zamora gipakita karon sa bag-ong mga miyembro sa ComVal SP nga sila andam na sa pagtuman sa ilang tahas ug mga buluhaton, ug kabahin sa gihimong mga pagpangandam ang daling pag-aproba sa bag-ong  Internal Rules and Procedure nga giduso nila ni SP Members Neri Barte ug Cesar Richa pinaagi sa paghatag ug unanimous vote.

Apil sa mga miboto pabor niini sila si Board Members Tyron Uy, Atty. Ruwel Peter Gonzaga, Moran Takasan, Macario Humol, Ramil Gentugaya, Paul Galicia, Atty. Arvin Dexter Lopoz, Joseph Jaoud, Felisa Navarro, Agusto Blanco, Jr., ug Vivencia Secuya.

Pinaagi sa bag-o naaprobahang Intenal Rules and Procedure makalaom karon ang mga katawhan sa mas hapsay, han-ay, ug paspas nga service delivery tungod ang matag Board Member atol sa ilang Maiden Session diha sa Kapitolyo niadtong Hulyo 3 misaad usab pinaagi sa ilang tagsa-tagsa ka opening speech sa pagduso ug pagsuporta sa mga balaodnon nga mo-complement sa mga programang pangkalambuan ni Governor Arturo “Chiongkee” Uy.

Ang  gibag-ong Internal Rules of Procedure maoy mamahimo nilang gabayan aron  nga luyo sa pagrespeto sa gawasnon kun independenteng desisyon ug panghuna-huna sa matag usa kanila, sa  gihapon padayon nga mapreserbar ang maayong relasyon, ang kahapsay, ug han-ay nga mga panagsabot panahon sa ilang session. (Gilbert M. Cabahug, ids-comval)