Monday, July 8, 2013

NICO ug LGU Nabunturan Fastest Bayani Builders gihapon

by Gilbert M. Cabahug

COMPOSTELA VALLEY PROVINCE-----Padayon gihapon karon nga giilang Fastest Bayani Builders sa liderato sa probinsiya ug sa National Leadership sa Gawad Kalinga ang team builders sa Nabunturan Integrated Cooperative (NICO) ug ang Team Builders sa LGU Nabunturan. Kini tungod ilang nahuman pagtukod sulod lang sa upat ka adlaw ang giangkon nilang balay panahon sa usa ka semanang House Build diha “Kariyawan USWAG-GK Village” sa Monkayo niadtong Hunyo 12-19, 2013.

Alang sa LGU Nabunturan maoy midawat sa sertipiko ingon nga Fastest Bayani Builders si Mayor Romeo Clarin gikan nila ni Southern Mindanao GK Head Rene Rieta; sa mga dagkong opsiyal sa LGU Monkayo; ug ni SB Member Elect  Raul Timogtimog sa Maco-  kasamtangang USWAG GK Action Officer ug maoy nagrepresentar kang Gov. Arturo “Chiongkee” Uy.  Sa NICO maoy midawat sa ilang sertipiko ang ilang Gen. Manager nga si Mr.Nick Tayabas ug ang ilang BOD Vice Chair nga si Mr. Francis Secuya.

Kahibaloan nga sa unang National GK Build diha sa “SOP Kahiusahan USWAG GK Village” sa Brgy. OsmeƱa, Compostela niadtong Marso 23-27, 2013 ang NICO ug ang LGU Nabunturan  maoy giilang Fastest Bayani tungod lima lang ka adlaw nila nahuman ang usa ka Duplex House nga ilang gitukod.

Apan sa ikaduhang National GK Build sa ComVal nga malampusong gihimo diha sa Monkayo adunay tulo nga giilang Fastest Bayani Builders, ug ang ikatulo mao ang Team PGSO tungod nahuman sad nila sulod lang sa upat ka adlaw ang gitukod nilang balay.  Mismong si PGSO Chief Arceli Timogtimog maoy midawat sa ilang sertipiko ingon nga Fastest Bayani Builders panahon sa Closing Program.

Gitug-an ni Provincial Tourism Officer Christine Dompor nga gitakda ang Turnover sa bag-o nahumang 50 ka mga balay sa Hulyo 24, ug gilaomang motambong ang mga dagkong opisyal sa Berjaya Group of Companies sa Malaysia nga maoy nagdonar sa mga materyales sa gitukod nga mga balay.

Sa usa ka semanang National GK Build sa Monkayo ang mga empleyado sa kapitolyo maoy nag-angkon pagtukod sa 16 ka mga balay, ug dunay mokabat 12 Bayani  Team Builders nga gipadala si Gov. Uy alang sa maong katuyoan.  (Gilbert M. Cabahug, ids-comval)

No comments:

Post a Comment