Provincial ug Congressional Officials sa Comval nanumpa na

by Gilbert M. Cabahug

COMPOSTELA VALLEY PROVINCE-----Nanumpa na aron pagtuman sa ilang mga tahas ug buluhaton ang tanang Team ComVal Provincial ug Congressional candidates nga midaug sa milabay’ng Mayo 13, 2013 nga piniliay nga sila si  Gov. Arturo “Chiongkee” Uy, Vice Gov. Elect Manuel “Way Kurat” Zamora, 1st Dist. Congresswoman Maricar Zamora, 2nd District Cong. Rommel “Bobong” Amatong, ug ang midaug nga mga SP Members.  Kahibaloan nga sa milabayng Mayo 13,2013 nga piniliay  ang Team Comval mitala ug 100% nga kadaugan sa provincial ug congressional positions.             

Sa gihimong Oath-Taking Ceremony niadtong Hunyo 29, 2013 diha sa Nabunturan National  Comprehensive High School, maoy unang mihural atubangan ni Judge Divina T. Samson aron pagtuman sa ilang tahas ug buluhaton ang SP Members sa unang Distrito nga sila si Board Members Ramil L. Gentugaya,  Paul Galicia, Atty. Arvin Dexter Lopoz, ug Joseph Jaoud sa Montevista. Nagsunod kanila nga mihural usab, ang SP Members sa Distrito 2 nga sila SP Members Tyron Uy, Atty. Ruwel Peter Gonzaga, Cesar Richa, Moran Takasan, ug Macario Humol.

Katapusan nga mihural ngadto ni Judge Samson mao si Gov. Uy, ug siya mihural sunod kang Vice Gov. Manuel “Way Kurat” Zamora.  Apan maoy sunod human sa SP Members si Congw. Maricar Zamora ug nagsunod kaniya si Cong. Rommel Amatong.

Niadtong Hulyo1, 2013, nagsugod na paglingkod ang bag-ong set sa Provincial Officials, ug atol sa convocation program sa mga empleyado sa Kapitolyo pormal nga gipahibalo ni Gov. Uy ang pipila ka mga kabag-uhan sa iyang pagdumala sulod sa dugang tulo pa ka tuig niyang paglingkod isip gobernador sa Compostela Valley.  (Gilbert M. Cabahug, ids-comval)