Gov. Uy: Brgy. Andap duna pay lugar nga pwedeng mapuy-an

 by Gilbert M. Cabahug

COMPOSTELA VALLEY PROVINCE-----Aduna pa gihapoy dapit diha sa Brgy. Andap nga pwede pang mapuy-an, apan matud ni Gov. Arturo “Chiongkee” Uy nga kasagaran sa mga lugar diha sa barangay gi-deklara nang non-livable sa MGB ug kanang mga lugara wa na gayo’y tugotan sa gobyerno nga magpuyo kay nabutang sa kakuyaw ang ilang kinabuhi.

Kahibaloan nga ang Brgy. Andap diha sa lungsod sa New Bataan mao gyoy nagrabehan sa nahitabong landfall sa Supertyphoon Pablo niadtong Disyembre 4, 2012 tungod sa liboang kinabuhi nga nakalas ug nangawalang mga pinuy-anan, pananom, kabtangan, ug panginabuhian. Sa nahitabong landfall sa Supertyphoon Pablo gitug-an sa mga kadagkoan sa PAG-ASA nga diha gayud sa Brgy. Andap mihagsa ang mata sa bagyo nga tungod sa dala niini nga daghang tubig ug kusog kaayong hangin nahitabo sa lugar ang usa ka higanteng Debris Flow.

Ang mga Filipino Scientists kinsa mga dagkong opisyal usab sa Project NOAH– DOST ug Faculty Members sa National Institute of Geological Sciences sa University of the Philippines ang nagpagula sa

 

ilang report nga napatik sa Philippine Daily Inquirer niadtong Pebrero 10, 2013, ug matud sa report nga ang dako kaayong debris flow nahitabo diha sa Brgy.Andap human nga ang Typhoon Pablo (international name “Bopha”) mihimo’g landfall sa Mindanao.  Ang maong bagyo giilang category 5 sa US Meteorological Experts nga dunay gikusgong 185 kph, ug ang iyang huros miabot sa 210 kph.

Sama sa linog, landslides, ug mga pagbaha, ang nahitabong Debris Flow maoy usa sa  natural phenomenal events nga nagbalik-balik sa Brgy. Andap New Bataan.  Apan wala lang kaayo masayod niini ang mga katawhan tungod gawas nga dugay na kaayo ang mga panghitabo dili sad susama ka grabe ang gidak-on sa milabay’ng mga debris flow nga nahitabo sa lungsod.

Ang higanteng debris flow nahitabo diha sa Brgy. Andap tungod sa sobra ka daghan sa tubig ug kusog kaayong hangin nga maoy nakahuyang sa mga dagkong lubi ug kahoy sa ibabawng bahin sa bukid.

 Tungod walay laing mapaingnan, ang tanang deposito sa naibot nga mga lubi ug kahoy, ang mga yuta, ug mga dagkong bato nga nadala sa tubig gikan sa taas diha gyod gibanlas sa Brgy. Andap.  (Gilbert M. Cabahug, ids-comval)