Sa ComVal: Aboitiz Foundation nagtukod ug dugang 12 classrooms sa 2013

COMPOSTELA VALLEY PROVINCE-----Apil sad karon ang Aboitiz Group of Companies sa daghang mga kompanya diha sa Compostela Valley nga hugtanong nagpakita sa ilang kadasig sa pagtuman sa ilang Corporate Social Responsibility (CSR) nga nakatabang ug dako sa liderato sa probinsiya sa padayong pag-atiman sa mga panginahanglan sa mga katawhang Comvaleño. Kasagaran sa gitunol nilang tabang mao ang padayon nilang pagtukod ug School Buildings diha sa pampublikong mga eskwelahan sa sekondarya ug sa elementarya diha sa pipila ka mga lungsod sa ComVal.

Gitug-an ni PGSO Chief Arceli Timogtimog nga sa 2013 lang miabot na sa 12 classrooms ang gitukod Aboitiz Group of Companies pinaagi sa Aboitiz Foundation, ug kini dako kaayo’g natabang sa probinsiya sa pagtubag sa dako kaayong panginahanglan ug classrooms diha sa pampublikong mga eskwelahan labi na nga nangadaot sa milabay’ng Supertyphoon Pablo ang  kadaghanan sa natukod nang school buildings sa onse ka mga lungsod.

Karong tuiga ang Aboitiz Foundation nagtukod ug School Buildings sa duha ka pampublikong mga eskwelahan sa Compostela nga diin, ang upat ka classrooms ilang gitukod diha sa  Aurora E.S. ug dunay laing tulo nga ilang gitukod diha sa Compostela Central E.S. Lima sad ka classroom ang ilang gitukod sa Nabunturan Central E.S., ug ang usa niini mao ang gitukod nilang Kindergarten Building.

Gisulti ni Gov. Arturo “Chiongkee” Uy nga tungod sa maayong sistema sa pagpadagan sa gobyerno ug sa nagpadayong lig-on ug hugot nga panaghiusa sa mga lideres ug mga katawhan, ang probinsiya sa Compostela Valley maoy paboritong probinsiya nga kanunay’ng adtoan sa mga donors aron hatagan sa lain-laing klase sa mga hinabang.

Gani hangtud karon padayon pa gihapon matud pa, nga giulan sa mga hinabang ang probinsiya sa ComVal tungod maoy sulti sa mga donors nga ganahan sila motabang sa probinsiya  tungod maayo kaayo ang sistema sa pagdumala sa gobyerno nga diin walay mga babag o mga butang nga makalangan sa implementasyon kay mosuporta gyod dayon ang tanang lideres lakip na ang community nga motabang sad kanila sa mga trabahoon aron daling mahuman ang gitunol nilang mga proyekto.

Tungod sa padayong pag-abot sa daghang mga tabang gikan sa national nga gobyerno, kaubanang Local Government Units, mga dagkong negosyante, NGOs, ug Humanitarian Partners, malaumon karon si Governor Uy nga mas daling maka-recover ang tibook probinsiya labi na ang mga katawhang Comvaleño gikan sa dili tiaw’ng pagkalusno sa kahimtang sa ilang pamuyo ug panginabuhian human maigo sa Supertyphoon Pablo ang lugar nga ilang gipuy-an.  (gilbert m. cabahug, ids-comval)