by Gilbert M. Cabahug
COMPOSTELA VALLEY PROVINCE-----Giklaro karon ni Governor Arturo “Chiongkee” Uy nga ang programang pabalay sa mga kabus ilalom sa Gawad Kalinga maoy usa sa mga Flagship Program sa iyang administrasyon mao nga kining programaha ipadayon gayud ug mas pakusgon pa sa tibuok probinsiya sulod sa ikatulo na niya nga termino may bagyo man o wala. Kini tungod maoy nakabenepisyo niini ang labing naglisod nga mga katawhang Comvaleño.
Sa wala pa sugdi ang Oath Taking Ceremony sa midaug nga Congressional ug Provincial Officials sa Compostela Valley diha sa Nabunturan National Comprehensive High School niadtong Hunyo 29,2013 adunay gihimong press conference nga diin sila si Gov. Uy, Congresswoman Maria Carmen Zamora, ug Vice Governor Elect Manuel “Way Kurat” Zamora maoy nanubag sa mga pangutana sa mga sakop sa Media. Atol niini gipahibalo mismo sa gobernador ang mga butang nga iyang pagatutukan sulod sa ikatulo na niya nga termino.
Gawas sa iyang programang pabalay gisulti usab sa gobernador ang uban pang priorities sa iyang administrasyon sa padayong pagtunol ug maayong serbisyo sa mga katawhan nga naglakip sa health services, edukasyon, infra-structure, agrikultura ug livelihood.
Kahibaloan nga sa ikaduha ug sa ikatulo niyang pagpasubli siya mikandidato nga walay kontra, ug matud pa niya nga kini timaan sa padayong pagsalig kaniya sa mga katawhan, diha sa maayong pagdumala isip amahan sa probinsiya. Gani sulod sa unom ka tuig niyang paglingkod isip gobernador sa ComVal sayod ang mga katawhan nga iya gayung gituman ang tanan niyang mga saad kanila. (Gilbert M. Cabahug, ids-comval)
No comments:
Post a Comment