Dugang P88.55 M gihatag ni P-Noy sa Comval alang sa pabalay

Mihatag na sad karon si Presidente Benigno Aquino-III ug dugang P88.55 Milyones alang sa pabalay sa Compostela Valley, ug maoy hatagan niini kadtong Typhoon Pablo Victims nga wa na gyoy balayng kapuy-an tungod totally damaged ang ilang balay human mahiagom sa grabe ka kusog nga pagkuso-kuso sa giilang usa sa pinakangilngig nga bagyo sa kalibutan.

Sa malampusong Provincial Development Council(PDC) Meeting niadtong Biyernes Hulyo 26,2013 gisulti mismo ni PDC Chair Gov. Arturo “Chiongkee” Uy sa iyang paghatag ug “short briefer” nga pinaagi sa opisina sa Department of Social Welfare and Development (DSWD) si President PNoy mihatag karon sa Comval ug dugang P88,550,000.00 alang sa pabalay ilalom sa ilang “Modified Shelter Assistance Program”.

Kining kwartaha gamiton alang sa “On Site Construction” sa unang 1,265 pamilyang Comvaleño nga totally damaged sa bagyo ang ilang balay apan diha nahimutang sa lugar nga deklaradong “Build Zone” kon “safe for habitation” sa Gobyerno. Ang kada balay adunay Budget nga P70,000.00 pesos alang sa materyales. Way labot niini ang budget sa labor component pinaagi sa Cash for Work nga magagikan gihapon sa DSWD.

Ang construction dumnalahon sa probinsiya, ug matud ni Gov. Uy nga sundon gihapon ang GK Way nga pamaagi sa pagtukod nga diin patabangon gihapon niya sa “On Site Construction” ang community.

Sa laing bahin, gisulti karon ni Vice Gov. Manuel “Way Kurat” Zamora nga aprobado  na sa Comval SP ang Memorandum of Agreement (MOA) sa DSWD ug sa probinsiya alang sa gihisgotang P88.55 Milyones nga pundo sa pabalay. Gawas nga aprobado na ang  MOA, gihatagan sad sa Comval SP si Gov. Uy ug Authority sa pagpirma niini ilallom sa naaprobahang reslolution nga giduso ni SP Member Atty. Arvin Dexter Lopoz atol sa 4th Regular Session sa 6th Sanggunian niadtong Miyerkules Hulyo 24,2013.

Mibuto pabor sa naaprobahang resolution sila SP Members Tyron Uy, Ramil Gentugaya, Atty. Ruwell Peter Gonzaga, Cesar Richa, Macario Humol, Paul Galicia, Joseph Jaoud, Neri Barte, Moran Takasan, Felisa Navarro ug uban pa. (gmc/ids comval)