Pagbutang ug puhunan sa Samal seguradong ganansya

ni Noel Baguio

SYUDAD SA DAVAO– “Karon na ang hustong panahon nga magbutang ug puhunan sa isla sa Samal ilabina sa Talikud aron dali nga makabawi sa gasto.”

Kini ang gipahayag ni Gobernador Rodolfo del Rosario atubangan sa mga bisita nga mitambong sa

Trade and Tourism Investment Conference gikan sa Brunei Darussalam, Indornesia, Malaysia.

Philippines – East Asian Growth Area (BIMP-EAGA) nga didto gipahinabo sa Marco Polo Hotel, Lunes, Enero 5.

Gipaneguro ni del Rosario nga motubo gayod ang ibubo nga puhunan sanglit sa mubo nga panahon mokusog pa ang turismo ug negosyo.

Iyang gitug-an nga gipanday na karon ang kompletong plano alang sa kasegurohan sa turismo ilabina sa mga turista nga moadto sa isla aron dili na maotro ang dili maayong panghitabo dili pa lang dugay didto sa Samal. 

Giklaro sa gobernador nga dako gayod kaayo ang bentaha sa turismo ug negosyo sa Samal sanglit natural ang iyang katahom, puno ug dagaya sa bahandi nga kadagatan ug duol usab kini kaayo sa mauswagon nga syudad sa Davao.

Ginganlan sab ni del Rosario ang dugang pa nga mga bentaha sa isla-syudad sa Samal nga naglakip sa puti ug pino nga mga balas sa baybayon, primera klase nga diving sites, makapadaning lokal nga produkto ug mga kalan-on ug ilabina ang mahigalaon ug mabiabihon nga katawhan nga sa walay duhaduha maghimo sa Samal nga pangunang adtoanan sa mga turista.  

Matod ni del Rosario nga bisan ang pagbubo ug kapin P1 billion nga kantidad aron matubag ang gikinahanglan nga imprastruktura sa isla, dili ingon nga pag-usik sa puhunan sanglit mapadali ug mapasayon ang pag-abot sa Talikud hinungdan nga daling mabawi ang gasto.

Iyang gitug-an nga sa pagka karon sobra 400 ektaryas nga luna ang barato nga mabatonan pinaagi sa pagpalit, pag-arkila ug kaha magkombuya sa negosyo (joint venture).

Gidugang ni del Rosario nga gitutokan pag-ayo sa probinsyal nga kagamhanan angTalikud sanglit anaa ang proyekto nga Open Beach Line nga gipondohan sa gobyerno sa Canada ubos sa Local Governance Support Program for Local Economic Development (LGSP-LED).

Pinaagi sa maong Open Beach Line nga proyekto gilauman nga ang Talikud mahimong modelo alang sa mapinadayonon nga turismo ug magpatungha ug kompetensya nga dugang magpadako sa pamuhunan sa rehiyon sa Davao.

Gisugdan na sa probinsyal nga kagamhanan ang pagbansay sa mga taga-isla sa lainlaing katakos (skills) aron matubag ang panginahanglan ug pagdaghan unya sa mga turista.

Hugot usab nga gilaoman ni Gobernador del Rosario nga mokusog pa gayod ang turismo sa isla-syudad sa dihang sugdan na ang paghimo sa tulay nga magdugtong sa isla sa Samal ngadto sa mainland.

Gitawag kini ni del Rosario nga “Tulay sa Pagbag-o” (bridge of change) sanglit mag-usab kini sa kinabuhi sa mga taga isla sa Samal nga magdugtong ngadto sa maayong umaabot,