Panabo City, Davao Del Norte- Gisugdan na kaniadtong huwebes, Octobre 1, ang 1ST Mayor James G. Gamao Liga Pasada Basketball Cup didto sa ARF covered court sa Barangay New Pandan nga gisalmotan sa mga nagkadaiyang Tricycle ug Trisikad Driver’s Association sa Panabo.
Una pa gipahigayon ang opening program, nagmotorkada ang mga Tricycle ug Trisikad palibot sa mga main road sa syudad.
Atol sa opening program, gipahinumdoman ni mayor James G. Gamao ang matag team nga ipatigbabaw ang sportsmanship aron nga mamahimong malinawon ug masadya ang maong paliga.
Ang Oath of Sportsmanship gipangunahan ni City Councilor Wahid Ranain ug gisundan kini sa ceremonial Toss nga gipangunahan usab ni City Vice Mayor Janrey G. Gavina. Mitambong usab si City Councilor Mawi Pamisaran.
Unang nagtigi ang PNSVTODA ug RHTG sa score nga 39 vs.58 pabor sa PNSVTODA. Sa second game gipildi sa PISSODOA ang KATODA sa score nga 69 vs.50.
Ang maong liga gisalmotan sa 28 ka team ug kini magsugod sa ala una sa hapon hangtud sa alas otso sa gabii ug matapos kini sa Oktobre 18.
Ang Liga Pasada usa sa mga sports program ni Mayor James G. Gamao nga gipasiugdahan sa buhatan ni City Vice Mayor Janrey “Biboy” G. Gavina.
Dagkong ganti ang naghulat sa mga mananaog nga diin ang Champion makadawat ug P8, 000.00, 2nd P6, 000.00 ug ang 3rd P4, 000.00.
Tumong sa maong padula nga mahatagan ug kahigayonan nga magkahimamatay ang matag draybers bisan sa ilang kabisi sa pagpamasahero ug ila usab nga mapalambo ang ilang hilig sa sports labi na sa dulang sa basketball.
No comments:
Post a Comment