Tugoti nga tapuson ni PNoy ang iyang termino – AFP,PNP

Gi depensahan sa liderato sa Armed Forces of the Philippines (AFP) ug Philippine National Police (PNP) ang ilang commander in chief batok sa mga nanawagan nga mo resign kini.

“Si presidente Aquino adunay mandato sa katawhan isip napiling presidente ug dapat lang humanon ang iyang termino,” kini matod ni AFP Chief Gregorio Pio Catapang. Gipasalig usab sa hepe sa AFP nga dili na kinahanglan nga magpahigayon ug loyalty check sa ilang mga opisyal ug tropa.

Sa iyang kabahin, gi subli ni PNP acting Chief General Leonardo Espina ang nahimong pahayag ni Catapang, matod pa nga ang PNP buo ang suporta ug pagsalig diha sa liderato ni presidente Aquino.

Pipila ka grupo ang nanawagang mag resign ang presidente human sa nahitabong madugoong engkwentro ngadto sa Mamasapao, Maguindanao ug sa bag-ohay palang gipaguwang desisyon sa korte suprema mahitungod sa Disbursement Acceleration Program. (etf/PIA)