Internet nakahatag dagku’ng oportunidad sa gagmay’ng negosyante, matud sa Google

Ang ‘internet’ nahimong importanteng tigmaneho sa ekonomiya sa kalibutan, matud sa manager sa ‘Public Policy and Government Affairs’ sa Google, bag-ohay pa lamang.

Ang dali nga paggamit sa internet ug ang abilidad sa paghatud sa datus palabang sa mga utlanan sa kanasuran ang mipadaku sa kita sa mga negosyante ug nagpakunhod sa gasto sa pagbiyahe sa mga produkto, busa mi-usbong ang ekonomiya ug daghan ang nahatagan sa trabaho, matud pa ni William Fitzgerald. 

Si Fitzgerald ang usa sa mga mamamulong sa First Public-Private Dialogue on Services sa gipahigayong Asia-Pacific Economic Cooperation’s First Senior Officials' Meeting (APEC-SOM1) nga gipahigayon sa Fontana Convention Center, ning siyudad, bag-ohay pa lamang.

Lakip sa gihisgutan ni Fitzgerald sa nasangpit nga okasyon ang sakop sa mga serbisyo sa internet nga dala sa gitawag nga ‘digital trade,’ ug ang mga oportunidad sa paglambo, partikular ang gagmay’g negosyante ug entrepreneur.

‘Ang Internet ug ang padayong paghatud sa ‘cross-border data’ naghatag sa mga gagmay’ng mga negosyante ug entrepreneur mga dagkung oportunidad nga mga maka-apil sa pag-usbong sa eokomiysa sa kalibutan,” dugang sulti ni Fitzgerald. (PIA)