Dugang libreng semilya sa Cacao ipanghatag

COMPOSTELA VALLEY PROVINCE – Tungod sa grabeng pagsaka sa demand nga miresulta sa padayong pagsaka sa presyo Cacao diha sa mercado kining tanoma maoy usa sa mga High Value Commercial Crops(HVCC) nga gitinguha sa gobyerno nga mapadaghan ang produksiyon.

Gisulti mismo ni Mindanao Development Authority (MinDA) Secretary Luwalhati R. Antonino nga nag-unang rason ang pagnihit sa Suuply sa Cacao didto sa mga kanasuran sa Africa nga maoy giilang top producer niining tanoma sa kalibutan.

Matud pa usab niya nga usa sa iyang tuyo sa pagbisita sa Comval Province ang pagpahibalo mahitungod sa  dakong pundo nga gigahin ni PNoy alang sa produksiyon sa Cacao pinaagi sa pagpanghatag ug libreng semilya niini ngadto sa mga mangunguma, nga mahitabo human ang pagpadaghan sa mga semilya pinaagi sa pagahimoong  nursery sa probinsiya ug mga kalungsuran gamit ang dakong pundo nga ihatag sa national nga gobyerno.

Pasado alas 11:00 sa buntag niadtong Pebrero 12,2015 miabot sa Comval Capitol sila si MinDA Sec. Antonino, Usec. Janet Lopoz, ug uban pang mga dagkong opisyal sa MinDA, ug sa ilang paghiabot sila malipayong gisugat ni Provincial Administrator Virgilia S. Allones nga maoy naggiya kanila sa opisina ni Gov. Arturo “Chiongkee” Uy nga sa tumang kahinangop malipayong miabi-abi kanila.

Human ang pipila ka minutong kolokabildo, kauban ang gobernador nangadto sila sa Governor’s Conference Room aron tambongan ang Regular Meeting sa  League of Municipalities nga gipanguluhan ni LMP Comval Chapter President Mayor Eutropio Jayectin sa Montevista.

Sa ilang paghiabot temparyong gihiklin ang uban pang mga hisgotanan sa Liga aron hatagan ug higayon si Gov. Uy nga temporaryong dumalahon ang Meeting sa ingon mahatagan ug hinanaling pagtagad ang mga importanteng tuyo sa mga sinaligan sa palasyo nga mituyo pagbisita sa Comval niadtong adlawa.

Ang LMP Meeting gitambongan nila Mayor Cesar Colina sa Maragusan, Mayor Romeo Clarin sa Nabunturan, Mayor Evalina Jampayas sa Mawab, Mayor Carlito Pacatang sa Laak, Mayor Amir Moños sa Mabini, Mayor Roberto Yugo sa Pantukan, Mayor Lema Bolo sa Compostela, ug Mayor Lorenzo Balbin Jr. sa New Bataan.

Mitambong sad sila Vice Gov. Manuel “Way Kurat” Zamora, Senior Board Member Tyron Uy, ug 1^st District Congw. Maricar Zamora. (Gilbert Cabahug/ids Comval)