Sen. Bam Aquino imbitado sa 8th Bulawan

COMPOSTELA VALLEY, Feb. 23- Ang pinakabatang senador sa 16^th Congress sa Pilipinas nga si Sen. Paolo Benigno “Bam” Aguirre Aquino IV maoy usa mga labing mahinungdanong bisita nga gilaomang motambong sa usa ka semanang selebrasyon sa 8^th Bulawan Festival ug 17^th Founding Anniversary sa Comval Province nga saulogon sa Marso 1-8,2015.

Gipahibalo kini mismo ni Bulawan Action Officer Senior Board Member Tyron Uy ngadto sa mga Municipal Mayors nga mitambong sa League of the Municipalities of the Philiipines (LMP) Regular Meeting nga gidumala ni LMP Comval Chapter President Mayor Eutropio Jayectin sa Montevista.

Nahitabo ang ilang meeting diha sa Governors’ Conference Room sa kapitolyo niadtong Pebrero 12,2015, ug panahon niini ilang gihatagan ug igong panahon si Tyron sa pagpresentar kanila sa bag-o nahumang Array of Activities nga gihikay sa Bulawan Committee alang sa usa ka semanang selerbasyon sa 8^th Bulawan Festival ug 17^th Founding Anniversary sa Comval.

Si Sen. Bam Aquino maoy usa sa mga labing mahinugdanong personalidad nga nahimong maestro ni Uy niadtong milabayng tuig panahon sa pipila ka bulang mga pagbansay sa “Leadership Academy” kauban ang mga piniling Local Legislators sa nasud.

Pinaagi sa “leadership Academy” nga gipasiugdahan sa Ateneo de Manila School of Government ug sa program partners niini nga mao ang “National Movement of Young Legislators (NMYL)” ug ang “Kaya Natin! Movement for Good Governance and Ethical Leadership” gipailalom sa libreng mga pagbansay didto sa Ateneo de Manila University sa Loyola  Heights, Quezon City niadtong Abril 11 hangtud  Agusto 23, 2014 ang mokabat 30 ka mga pinili ug hinashasang  Local Legislators sa nasud. (Gilbert Cabahug/IDS comval)