Mga “Lutong Tribu” uban ni Chef Boy Logro matilawan sa “Allaw ng Kalumonan” sa Comval

COMPOSTELA VALLEY, Feb. 23 – Sa unang higayon matilawan sa mga katawhan ang mga lamiang putahe nga lutoon sa nagkadaiyang tribu sa Comval nga apil sa mga lumadnong bahandi nga ipasundayag atol sa “Allaw ng Kalumonan” nga pagasulogon sa Comval Province sa Marso 7, atul sa usa ka semanang selebrasyon sa 8^th Bulawan Festival ug 17^th Founding Anniversary.

Mao kini ang pipila sa mga mahinungdanong butang nga nasabotan sa mga Tribal Leaders panahon sa “Provincial Tribal Council (PTC) Meeting” diha sa kapitolyo  nga gidumala nila ni IP Mandatory Representative Augusto Blanco Jr. ug PTC Chair ug SB Nabunturan  IP Mandatory Representative Datu Felipe B. Masambo.

Mitambongan sa Meeting sila  NCIP Comval OIC Provincial Officer Roger Lumbin; ug SB-IPMR nga sila Datu Honorio Erika sa Monkayo, Datu Guillermo Blanco sa Compostela, Datu Bernardo Lumikid sa Maragusan, Datu Federico Gadong sa Maco, Datu Danilo Sugpatan sa Pantukan, Bae Antonieta Macabani sa Mawab, ug Datu Jonah Edlay sa New Bataan.

Gikasabotan sa ilang Meeting nga sa Allaw ng Kalumonan adunay pasundayag sa lamiang putahe nga giluto sa lain-laing tribu sa Comval ug motilaw niini ang mga dagkong opisyal sa probinsiya sa pagpanguna nila ni Gov. Arturo “Chiongkee” Uy, Vice Gov. Manuel “Way Kurat” Zamora, ug Senior Board Member Tyron Uy.

Motilaw sad sa lami nilang mga luto si Master Chef Boy Logro nga sa unang higayon magpasundayag sa iyang abilidad pagluto diha sa kapitolyo atol sa usa ka adlawng selebrasyon sa “Allaw ng Kalumonan” sa Comval. (Gilbert Cabahug/IDS comval)