Compostela Valley Province – Gipasidunggan sa probinsyal nga
panggamhanan ang duha ka mga Comvaleño nga nanguna sa bag-o nahumang
Licensure Examination for Teachers (LET) nga sila si Ralph Remulta-Top
4, ug ang Top 7 nga si Luwalhati Millana-Nasol nga bag-o lang natudlong
Municipal Administrator sa Laak, Comval.
Maoy naghatag kanila sa sa sertipiko nga pirmado ni Gov. Arturo Uy
niadtong Nobyembre 3 sa kapitolyo sila Senior Board Member Tyron
Uy-Chairman sa Committee on Education and Information Technology ug SP
Members Macario Humol ug Neri Barte. Gisulti sad ni BM Uy nga dugang sa
gitunol nga mga sertipiko ang Laptop nga ihatag sad personal ni Gov. Uy
kada usa kanila.
Si Ralph Remulta nga kamanghurang anak sa usa ka Small Scale Miner
diha sa Brgy. Pindasan, Mabini maoy usa sa mga palarang Comval
Scholarship Program (CVSP) Scholars sa probinsiya nga migradwar nga
Magna Cum Laude sa kursong BSED sa UM Tagum Campus niadtong Marso 2014.
Matud
niya daku kaayo ang iyang kalipay ug pasalamat nga nahimu siyang
iskolar sa Comval LGU. Niadtong Agosto pipila ka bulan lang human sa
iyang graduation, siya apil sa liboang mga Estudyante sa nasud nga
mikuha sa licensure examination alang sa mga magtutudlo (LET) nga diin
ang resulta niini nagtug-an nga siya maoy ikaupat nga nakakuha sa
pinakataas nga Passing Score.
Pasado sad sa LET ang laing pito ka CVSP Scholars nga sila Jovy
Gonzales sa Mawab; Almera Jusay sa Maco; ang mga taga New Bataan nga
sila Sheryl Mae Otom, Melysin Calago, ug Meljurie Rebucas; ug ang laing
duha nga migradwar nga Cum Laude nga sila Irish Michelle Calipayan sa
Monkayo ug Norman Jalmaani sa Mabini. (gilbert cabahug/ids comval)
No comments:
Post a Comment