Oportunidad sa panarbaho bukas alang sa CVSP Scholars nga nakahuman pag-eskwela nga “with flying colors”

 Compostela Valley Province--– “Focus nako karon nga matabangan ang upat pa nako ka mga manghod aron sila sad makahuman sa ilang pag-eskwela.” Kini maoy sulti sa kanhi  eskolar sa Comval Scholarship Program (CVSP) nga si Kim F. Baloca kinsa nakahuman nga Magna Cum Laude sa kursong sa Bachelor of Science in Accountancy (BSA) sa University of Mindanao (UM) Tagum Campus  niadtong 2012.

Si Baloca migradwar niadtong Marso 2012 ug usa sa mga palarang mipasar sa CPA Board Exam sa   Oktobre sa mao gihapong tuig. Human niini siya nagtrabaho nga College Instructor sa Arriesgado College of Midwifery ug sa St. Thomas Moore College, ug niadtong Enero 22, 2014 siya nakatrabaho sa Comval Capitol sa posisyong Accountant–II.

Si Baloca maoy usa sa daghang CVSP Scholars nga nakaangkon ug maayong opurtunidad sa panarbaho human sila migradwar “with flying colors” tungod sa mga paningkamot, dedikasyon, ug lig-ong determinasyon nga makahuman sa ilang pagtuon uban ang mapadayonong pag-agak kanila sa probinsiya.

Sama kang Baloca naablihan sad ang ganghaan sa maayong pagpanarbaho diha sa pribado ug pampublikong mga buhatan sa ubang CVSP Scholars ug daghan kanila nakatarabaho na sa kapitolyo sama nila ni Janice Naquila ug Maya Pelandas (Cum laude) nga karon mga CPA na ug kauban ni Baloca sa Provincial Accountants Office; nila ni Don James Villano, Julius Custoy (Cum Laude), ug Randy Collin Remis sa opisina ni Senior Board Member Tyron Uy; ug ni Alvin Ros Gisma nga diha na karon sa opisina ni Gov. Arturo “Chiongkee” Uy.

Apil sad sa mga CVSP Scholars nga nakatrabaho sa kapitolyo sila Nhie Dotollo (Cum laude) sa PSWDO; Jasmin Sibla sa opisina ni SP Member Raul Timogtimog; Roger Socias sa PGSO; ug ang diha sa HRMD nga sila Alexis Micutuan, Meldrid Artita, Emie Vallestro, ug Grace Gabutan.

“Pasalamat gyod ko’g dako ilawom sa liderato ni Gov. Uy kay dako kaayo’g natabang ang CVSP sa akong pag-eskwela. Karon ang mga kaayohan labi na ang maayong oportunidad sa panarbaho akong paningkamotan nga mabalik pinaagi sa maayong trabaho nga akong mahatag isip usa ka Acountant sa kapitolyo,” matud ni Baloca. (gilbert cabahug/ids comval)