Dugang 590 ka On-Site Shelters nga gitukod sa Compostela human na

Compostela Valley Province – Human na sad ang dugang 590 ka On-Site Shelters kon  mga balay nga gitukod sa gobyerno diha sa Compostela  alang sa Typhoon Pablo Survivors nga totally damaged ang ilang mga balay human sa bagyo, ug tungod diha sila nahimutang sa mga lugar nga deklaradong Safe for Habitation  kon luwas puy-an sa DOST ug sa MGB hinungdan  nga kining mga balaya diha ra sad tukora dapit sa  nahimutangan sa daan nilang   pinuy-anan (on-site).

Ikaduhang hugna kini sa proyektong pabalay nga On-Site Shelters ug apil sa mga nahuman  ang diha sa Brgy. Bagongon-83 ka mga balay, ang sa Brgy. Maparat-66 ka mga balay, sa Brgy. Mapaca-113 ka mga balay, sa Brgy. Lagab-94 ka mga balay, sa Brgy. San Miguel-199 ka mga balay, ug sa Brgy. Aurora-36 ka mga balay.

Kabahin sa gihingusgang “Rebuilding and Recovery” sa liderato sa probinsiya sa pagpanguna nila ni Gov. Arturo “Chiongkee” Uy, Vice Gov. Manuel “Way Kurat” Zamora, ug Senior Board Member Tyron Uy ang gipakusog nga programa sa  pabalay gamit ang dakong pundo nga gihatag sa Comval ni Pangulong Benigno S. Aquino III pinaagi sa Department of Social Welfare and Development (DSWD) alang sa gitukod ug pagatukoron pa nga mga On-site Shelters.

Ang pagtukod niining mga balaya gipangunayan gyod sa liderato sa probinsiya pinaagi sa Provincial Engineers’ Office sa pagpanguna ni PEO Chief Engr. Rhoderick Digamon, ug base sa gipagulang Joint Report sa PEO ug PSWDO nga human na niadto pang bulan sa Pebrero 2014 ang 247 housing  units  alang sa 1^st Trance kon unang hugna niining klaseha sa pabalay. Apil sa mga unang nahuman ang diha sa Brgy. Poblacion-183 ka mga balay, ug ang sa Brgy. Osmeña-64 ka mga balay. (gilbert cabahug/ids comval)