Paglambo sa ekonomiya sa PH, mihinay sa unang upat ka bulan

Wala nakab-ot sa gobyerno ang target nga pag-uswag sa ekonomiya sa nasud pagsulod sa 2015. 

Base sa datos sa Philippine Statistics Authority (PSA) diin 5.2-porsyento lang ang natalang pag-uswag sa Gross Domestic Product (GDP) sa nasud. 

Ang GDP ang kinatibuk-ang kantidad sa mga produkto ug serbisyo nga nahimo sulod sa nasud. 

Gipasabot ni Economic Planning Secretary Arsenio Balisacan nga epekto kini sa ubos nga public spending nga bunga usab sa pag-ubos sa public construction. 

Taliwala niini, gipasigarbo sa Kalihim nga mas taas na ang nahimong paggasto sa  gobyerno sa unang parte sa 2015 kun itandi sa susamang panahon niadtong 2014. 

" Ang growth performance ning kwarter nagsulti kanato nga naa pa`y mga isyo nga angay sagubangon sa gobyerno aron mamintinar ang taas nga lebel sa kompiyansa nga gipakita sa sektor sa patigayon ug pagsalig sa nasud,” matud pa ni Balisacan.

Masaligon ang gobyerno nga mas mopaspas ang paglambo sa ekonomiya sa nasud sa nahabiling bulan ning tuig. (PIA)