NMYL Comval mitabang sa Brigada Eskwela. Mokabat 600 mga lingkoranan gipanghatag ug giayo

Compostela Valley Province-- Apil sad ang National Movement for Young Legislators (NMYL) Comval Chapter sa pagpanguna ni NMYL Provincial Executive Committee Chair Senior Board Member Tyron Uy sa mga grupo nga hugtanong misuporta sa unom ka adlawng “Brigada Eskwela” nga nahitabo niadtong Mayo 18-23, 2015 pinaagi sa gihimong pag-repair ug pagpanghatag sa kapin kon kulang 600 ka mga lingkoranan.

Apil sa pampublikong mga eskwelahan sa sekondarya ug sa elementary nga nakabenepisyo  niini ang Nabunturan National Comprehensive High School (NNCHS), ang Magsaysay High School sa Nabunturan, ang Compostela National High School, ang Bongabong High School ug Napnapan Elementary School sa Pantukan, ug ang Union High School sa Monkayo.

Ubos sa DepEd Memorandum No. 41 Series of 2015 nga gipagula ni DepEd Secretary Brother Armin Luistro, opisyal nga gimando sa DepEd ang pagpahigayon sa “Brigada Eskwela 2015” nga diin ilalom niini gideklarang “National Schools Maintenance Week” ang Mayo 18-23, 2015 ilalom sa temang “Tayo Para sa Kalinisan, Kaligtasan at Kahandaan ng ating mga Paaralan.”

Sulod niining mga adlawa subling gihimo sa tanang pampublikong mga eskwelahan sa elementarya ug sa sekondarya sa Comval Province ang boluntaryong mga kalihokan sa pagpanghinlo ug pagpang-ayo sa mga eskwelahan kauban ang mga ginikanan mga opisyal sa kabaranggayan, mga magtutudlo, mga opisyal sa DepEd, ug ang “Adopt  A School Program Partners” nga mitabang aron ang mga eskwelahan mamahimong nindot ug amdam sa pagbukas sa klase alang sa School Year 2015-2016.

Ang Brigada Eskwela 2015 hugtanon sad nag gispurtahan sa liderato sa probinsiya sa pagpanguna nila ni Gov. Arturo “Chionkee” Uy, Vice Gov. manuel “Way Kurat” Zamora, Senior Board Member Tyron Uy ug SP Members pinaagi sa gipanghatag nga mga pintura, paint brushes, paint rollers nga gigamit sa pagpatahom, ug sa mga bugas nga gipanghatag sa tanang mga eskwelahan alang sa libreng paniudto sa tanang mga tawo nga misalmot sa usa ka semanang kalihokan tumong sa pagpanindot sa mga eskwelahan sa Comval Province. (Gilbert Cabahug/IDS Comval)