Comval Provincial Hospital mag-reimburse sa mga tambal nga napalit sa gawas

Compostela Valley Province – Alang sa mga pasyente diha sa Compostela Valley Provincial Hospitals nga dunay PhilHealth, gipahibalo karon ni PEEMO Chief Dr. John Edward Coloma nga kon mahitabo nga dunay resetang mga tambal sa Doktor nga wala sa botika ug didto kini mapalit sa mga botika sa gawas-andam ang Hospital sa probinsiya pag-reimburse kon pag-uli sa ilang nagasto pagpalit niining mga tambala.

Priority sa refund matud pa kadtong indigent nga mga pasyente nga na-enroll sa Government Sponsored Philhealth,  ug  segurohon lang nila nga Official Receipt gyod ang ilang ihatag sa hospital tungod kay mao kini ang gikinahanglan sa PhilHealth.

Gisulti kini ni PEEMO Chief Dr. Coloma niadtong Mayo 25,2015 atubangan nila PHO Chief Dr. Renato Basañes, DOH Region XI Provincial Health Team Leader Dr. Annie D. La Rosa ug Provincial Local Health Board (PLHB) Members atol sa ilang meeting nga gipanguluhan ni Gov. Arturo “Chiongkee” Uy pinaagi ni Executive Assistant Isabelo L. Melendres sa kapitolyo.

Ang bahin sa availability sa mga tambal diha sa upat ka Provincial Hospitals sa Comval Province maoy usa sa mga labing mahinungdanong butang nga ilang gihisgotan nga diin, usa sa mga nakitang hinanaling kasulbaran niini ang paghatag ug refund ngadto sa PhliHealth Enrolled nga mga pasyente labi na kadtong mga indigent nga naka-Enroll sa Government Sponsored Phlilhealth. (Gilbert Cabahug/IDS Comval)