P60M Bukal-Panoraon Road Project padayon pa nga gitrabaho

by Gilbert M. Cabahug

COMPOSTELA VALLEY PROVINCE-----Padayon pa karon nga gitrabaho ang kapin pito ka kilometrong “Bukal-Panoraon Road Rehabilitation Project” nga gitunol ni Pangulong Benigno S. Aquino-III sa ComVal ilalom sa PAMANA kon “Payapa at Masaganang Pamayanan Program”.  Matud ni Assistant PAGRO Chief Manolo Serafin Cayme- natudlong Team Leader for Special Projects Implementation Team sa ComVal nga sa pagkakaron anaa na sa 38% ang accomplishment sa mga nagtrabaho niini.

Kining proyektoha kabahin gihapon sa nag-unang Peace Building Initiatives nga giimplementar sa  Pangulo pinaagi sa Department of National Defense (DND), ug maoy gitahasan  sa pagtunol niini ngadto sa lokal nga gobyerno ang opisina sa Department of Interior and Local Government (DILG) nga ubos sa maayong pagdumala ni DILG Secretary Mar Roxas.

Niadtong Septyembre sa milabay’ng 2013 giaprobahan sa ComVal SP atol sa ilang 11th Regular Session nga gipanguluhan ni Vice Gov. Manuel “Way Kurat” Zamora ang Resolution to Adopt ni SP Member Atty. Arvin Dexter Lopoz  sa usa ka Draft MOA tali sa ComVal Province ug sa DILG alang sa pagahimoong Rehabilitation sa Bukal-Panoraon Road gamit ang pundo gikan sa OPAPP nga mokabat P60 milyones ilalom sa  PAMANA Program.

Giklaro ni DILG Assistant Provincial Director Brenda Salarda nga ang Seal of Good Housekeeping (SGH) maoy usa sa mga qualifying requirements sa usa ka LGU aron mahatagan sa bisan unsang klaseng projects nga ibubo sa pangulo pinaagi sa DILG, ug matud pa usab niya nga tungod ang Compostela Valley Recipient sa Seal of Good Housekeeping (SGH) mao nga kining probinsiyaha gihatagan sa DILG sa P60 milyones PAMANA Funds alang sa rehabilitation sa Bukal-Panoraon Road.

Ang mga nahatagan sa Seal of Good Housekeeping (SGH) sa kauluhan matud ni PPDO Chief Romeo Celeste  mao kadtong mga LGU nga human sa gihimong pag-evaluate sa DILG nag-excel ang transparency mechanism sa Good Governance ug sa Financial Management.

Matud pa usab niya nga unang nadawat nila ni Gov. Arturo “Chiongkee” Uy ug sa 11 Municipal Mayors sa ComVal ang Seal of Good Housekeeping niadtong 2011. Kauban niini ang P3 milyones nga Performance Challenge Fund nga nadawat usab sa probinsiya gikan sa DILG.  Ang  kada lungsod nakadawat usab ug Performance Challenge Fund nga P1Million. (gilbert m. cabahug, ids-comval)