4-Classroom Building nga gitukod sa Brgy. Teresa human na!

by Gilbert M. Cabahug

COMPOSTELA VALLEY PROVINCE-----Human na ang usa ka 4-Classroom Building sa New Leyte National High School-Teresa Campus diha sa Brgy. Teresa lungsod sa Maco nga gitabangan pagtukod sa  mga katawhan ilalom sa Kalinga sa Kabataan Bayanihan sa Paraalan Program (KKBSP) ni Gov. Arturo “Chiongkee” Uy.

Ang pagtrabaho niini nahuman sulod lang sa 22 ka adlaw ug matud ni SP Member Raul Timogtimog-kanhi USWAG GK Action Officer, nga unang higayon kini nga ang liderato sa probinsiya nagpasiugda sa GK Way nga pagtukod ug usa ka School Building nga adunay upat ka Classrooms.

Nahitabo ang Blessing ug Turn-over Ceremony niadtong Hulyo 28, 2014, ug tungod si Gov. Uy mitambong niadtong adlawa sa “State of the Nation Address (SONA)”  ni P-Noy, maoy kauban ni Vice Gov. Manuel “Way Kurat” Zamora  sa pagdumala niini sila SP Members Raul Timogtimog ug Atty. Ruwel Peter Gonzaga.

Niadtong adlawa ilang giturn-over ngadto sa DepEd ang bag-o nahumang 1 Unit 4 classroom building nga kompleto sa finishing touches, pintura, ug landscape. Sangkap sad kini sa mga pasilidad sama sa blackboard, teachers table ug mga bag-ong lingkoranan alang sa mga magtutudlo ug mga estudyante.

Puno sa emotions nga gihulagway sa ilang School In Charge nga si Ellen Paloma nga ingon sa giibot ug gibalhin lang ang daan nilang building nga nindot na diha sa bag-ong nahimutangan. Gitawag pa niya si Gov. Uy nga usa ka “miracle worker” tungod matud pa niya nga ingon nga siya nakasaksi ug usa ka magic tungod paspas kaayo ang pagtrabaho sa naghiusa ug nagtinabangayng mga katawhan ubos sa maayong paggiya ug pagpanguna sa mga dagkong opisyal ug mga empleyado sa Kapitolyo.

Gisulti sad niya nga bisan gani ang mga tindahan ug mga kabalayan sa palibot nag donar ug mga snacks ug mga pagkaon ngadto sa mga ginikanan ug sa uban pang mga bulontaryong lumilihok nga daw wala batia ang kakapoy tungod sila inspirado ug puno sa kalipay nga mitabang sa lain-laing mga buluhaton panahon sa construction.

Sa pagkakaron miabot na sa 72 ka mga eskwelahan ang nahuman pagtukod sa mga katawhan ilalom sa nagpadayong “Kalinga sa Kabataan Bayanihan sa Paaralan Program (KKBSP) ni Gov. Uy sa Compostela Valley.  (gilbert m. cabahug, ids-comval)