Shame campaign, i-atbang sa Comelec sa mga ‘epal’ nga politiko

Magpatuman og shame campaign ang Commission on Elections (Comelec) batok sa mga kandidatong magbutang og mga poster sa mga dili otorisadong lugar.

 Kagahapong adlawa, Pebrero 2, milagda og kasabotan ang Comelec, Department of Public Works and Highways (DPWH) ug Metropolitan Manila Development Authority (MMDA) alang sa hiniusang pwersa batok sa mga “epal candidates” nga dili mosunod sa patakaran kalabot sa common poster areas.

 Gawas sa tangtangon sa DPWH ug MMDA ang mga campaign materials, ipamantala pa sa Comelec ang mga kandidatong molapas sa mga patakaran sa fair elections act aron makita sa mga botante kun kinsa ang mga abusadong kandidato sa umaabot nga piniliay.

Nanawagan ang Comelec sa publiko nga motabang aron ma-report ang mga badlongon nga kandidato. (PIA)