DOLE, DOTC, DILG, DoJ lumagda ng kasunduan

Sa layuning maprotektahan ang mga manlalakbay at OFW mula sa ‘tanim-bala’

Lumagda sa isang kasunduan sina Kalihim Rosalinda Dimapilis-Baldoz ng Kagawaran ng Paggawa at Panghanap-buhay; Kalihim Joseph Emilio Abaya ng Kagawaran ng Transportasyon at Komunikasyon; Kalihim Emmanuel Caparas ng Kagawaran ng Katarungan; at Kalihim Mel Senen S. Sarmiento ng Kagawaran ng Interyor at Pamahalaang Lokal upang pag-isahin at pagsamahin ang lahat ng tungkulin ng lahat ng ahensiya ng pamahalaan na may kinalaman sa seguridad sa paliparan at pagsusuri sa mga pasahero, bagahe at kargamento sa lahat ng paliparan sa Pilipinas na titiyak sa proteksiyon at seguridad ng mga paalis na pasahero, lalo na ang mga overseas Filipino workers, na magtataas sa kaalaman ng pasahero ukol sa seguridad sa paliparan at paraan ng pagsusuri ng kanilang mga bagahe.

“Nilalayon ng kasunduan na mabigyan ng solusyon ang mga kaso ng ‘tanim-bala’, lalo na ang mga sangkot na OFW.  Sa tulong ng PNP-AVSEGROUP bilang tagapagpatupad ng batas, at ng National Prosecution Service, bilang tagapag-usig ng pamahalaan, mareresolba ang mga kasong ito.  Ang OWWA at POEA ng DOLE ang tutulong sa pagsasa-ayos ng proseso, lalo na sa mga paalis na overseas Filipino workers,” ani Baldoz sa ginanap na paglalagda ng kasunduan na ginanap sa VIP Lounge ng Terminal 3 sa NAIA.

Ang kasunduan ay nilagdaan nina PCSupt. Francisco E. Balagtas ng PNP Aviation Security Group (PNP Avsegroup); Commo. Roland S. Recomono, Administrator ng Office for Transportation Security (OTS); Maj.Gen. Jose Angel A. Honrado AFP (Ret), General Manager ng Manila International Airport Authority (MIAA); Prosecutor General Claro A. Arellano ng National Prosecution Service; Administrator Rebecca J. Calzado ng Overseas Workers Welfare Administration (OWWA); at Administrator Hans Leo J. Cacdac ng Philippine Overseas Employment Administration (POEA).

Tumayo bilang saksi sina Kalihim Baldoz, Kalihim Abaya, Kalihim Sarmiento, at Kalihim Caparas sa paglalagda ng kasunduan.

 Sa ilalim ng kasunduan, ang POEA ay magtatalaga ng empleyado sa NAIA terminal para tulungan ang mga OFW na nakuhanan ng mga ipinagbabawal na bagay, o sa kanilang bagahe, o kargamento; tulungan ang OFW na ayusin ang kaso, at kung kinakailangan, i-rebook ang kanilang biyahe sa pakikipag-tulungan ng airline company; payuhan ang mga manggagawa ng kanilang karapatang pantao na maaaring sumailalim sa Custodial Investigation; humiling sa Public Attorney’s Office ng agarang pagtatalaga ng Public Attorney na magbibigay ng legal na representasyon sa manggagawang sumasailalim sa imbestigasyon, pagsisiyasat, o paglilitis, kung ito ay wala pang abogado; at kung kinakailangan magbigay ng mga dokumento sa awtoridad na magpapatunay na ang taong nasa kanilang kustodiya ay isang OFW.

 “Ang POEA din ang hihiling ng tulong sa recruitment agency upang abisuhan at ipagbigay-alam ang pagka-antala ng pagdating ng manggagawa,” ani Baldoz.

 Naatasan naman ang OWWA na bigyan ng tulong ang manggagawang sumasailalim sa imbestigasyon, gayundin ang kasama nito, sa mga pangangailangan nito, kasama na ang pansamantalang pangangalaga ng kanyang personal na kagamitan; at kung kinakailangan ang pagsasagawa ng interbyu upang alamin ang personal na impormasyon, Overseas Employment Status/Record, at kung kanilang naisin, tawagan ang kanilang kamag-anak o kaibigan, magbigay ng pansamantalang matutuluyan kapag sila ay wala na sa kustodiya ng polisiya habang ito ay naghihintay na ma-rebook ang kanilang pag-alis o isaayos ang kanilang pag-uwi sa kanilang tahanan; bigyan ng stress debriefing at psycho-social counselling ang manggagawa pati na ang kanyang kasama, kung mayroon man, bago ito umalis.

Idinagdag ni Baldoz na isasama ng POEA at OWWA sa kanilang Pre-Employment Orientation Seminar (PEOS); Pre-Departure Orientation Seminar (PDOS); at iba pang programang pang-edukasyon ang mga pinagbabawal na dalhin at gawain na nakasaad sa R.A. No. 10591.

Nakasaad din sa kasunduan na ang Manila International Airport Authority (MIAA), isang ahensiya sa ilalim ng DOTC, ang mangangasiwa ng mga kaso na nangangailangan ng agarang pagsisiyasat sa mga security screening check points, bilang namumuno sa Airport Security Organization (ASO), upang maiwasan ang pagkaantala sa mga pasahero at ng kanilang bagahe; maayos na daloy ng pasahero at ng kargamento sa security screening checkpoint para maiwasan ang mahabang pila; paglalagay ng mga karatula at pagpapalabas ng video na magpapaalala sa mga pasahero ng mga ipinagbabawal na bagay sa paliparan at eroplano.

Sa kabilang banda, ang OTS ang magsasagawa ng aviation security screening sa lahat ng pasahero at bagahe ayon sa National Civil Aviation Security Program (NCASP); pagbibigay-alam sa PNP-AVSEGROUP sa mga nakuhang ipinagbabawal na bagay; tiyakin ang pagpapatupad ng standard operating procedure sa pagsasagawa ng security screening ng pasahero; at muling pag-iinspeksiyun ng mga bagahe sa harap ng AVSEGROUP, MIAA, at POEA o OWWA.

Batay sa kasunduan, agad na tutugon ang PNP-AVSEGROUP sa mga ilalapit ng OTS aviation security screener; agad na ipagbigay-alam sa Labor Assistance Center (LAC) ng POEA o sa Repatriation and Assistance Division (RAD) ng OWWA, gayundin sa MIAA, PAO at NPS, ng anumang insidente ng maaaring paglabag sa R.A. No. 10591 na kinasasangkutan ng OFW; tiyakin ang karapatang pantao na sasailalim sa imbestigasyon dahil sa paglabag sa R.A. No. 10591 at iba pang batas; pagtatalaga ng police officer sa aviation security screening checkpoint para sa mabilis na pagtugon; tiyakin na nasunod at naipaliwanag ng maayos ang karapatang pantao ng sumasailalim sa imbestigasyon batay sa R.A. No. 7438, o kilala bilang “An Act Defining Certain Rights of Persons Arrested, Detained or Under Custodial Investigation as well as the Duties of the Arresting, Detaining and Investigating Officers, and Providing Penalties for Violations Thereof”; at napag-aralang mabuti ang ebidensiya bago i-endorso sa paglilitis ng kaso sa Prosecutor’s Office.

Magtatalaga naman ang NPS ng prosecutor on-duty sa NAIA terminal na magsasagawa ng paglilitis at paunang imbestigasyon ng mga kaso at pagbibigay ng tulong sa tamang interpretasyon at paggamit ng batas sa pamamagitan ng orientation seminar at training program.

Magtatatag din ng Technical Working Group (TWG), na pamumunuan ng MIAA at bubuuin ng mga kinatawan na bahagi ng kasunduan, at magpupulong sa loob ng 15 araw mula sa paglagda ng kasunduan.  Ang TWG ang magsasagawa ng koordinasyon sa pagpapatupad ng mga gawain sa ilalim ng kasunduan.

END/GMEArce