D.A. mohatag sa Comval og dul-an P62 Milyones nga pundo sa panguma alang sa 2016

Compostela Valley Province---Apil sa mga mahinungdanong commitment ni Pangulong Benigno S. Aquino III pinaagi sa Department of Agriculture (DA) ang paghatag sa  tibuok Comval Province sa dul-an P62 Milyones pundo sa panguma alang sa tuig 2016 nga kabahin sa padayong mga paningkamot sa Rebuilding and Recovery nga  hugtanong gipatuman sa liderato sa probinsiya sa pagpanguna nila ni Gov. Arturo “Chiongkee” Uy, Vice Gov. Manuel “Way Kurat” Zamora, Senior Board Member Tyron Uy, ug SP Members.

Pinakadako niini ang kapin P26 milyones pundo nga gamiton alang sa mokabat 1,185,000 punoan sa Cacao Seedlings nga gitakdang ipanghatag nga libre ngadto sa mga mangungumang Comvaleño nga interesado kaayo nga magtanom sa nagkadaiyang variety sa Cacao.

Sulti ni High Value Commercial Crops Division Chief Minda Agarano sa Comval PAGRO nga dungan sa kapin P26 milyones Cacao Seedlings ang 184,370 punoan sa Coffee Seedlings sa kantidad nga P4,610,000.00 ug ang 63,270 Rubber Seedlings sa kantidad nga P3,164,000.00 nga gitakdang ipanghatag gihapon sa probinsiya nga libre ngadto sa Comvaleño Farmers karong tuiga.

Dugang ayuda ang hapit P1,000,000.00 kantidad sa ipanghatag nga libreng semilya sa Mungo Beans, sa mani, sa Yellow Onion, ug sa Red Onion; ang P304,000.00 kantidad sa ipanghatag nga libreng mga semilya sa lanzones, sa Mangosteen, ug sa Durian Seedlings; ug ang P750,000.00 para sa libreng semilya sa saging Cardava; ug ang P4,141,000.00 pundo nga gigahin para sa Technology Demonstration.

Apil sad niini ang P760,000.00 dugang pundo para sa lima ka Small Scale Irrigation Projects; ang P2,600,000.00 para sa Farm Machineries and Equipments; ang P1,809,000.00 para sa duha ka mga Nursery; ang P1,750,000.00 para sa Postharvest Processing Equipments;  laing P9,880,800.00 nga gamiton para sa Cacao Fermentation Facility ug sa tulo ka Banana Packinghouses; ug uban pa. (Gilbert Cabahug, PGO-IDS)