Panawagan sa Ombudsman sa mga botante: ayaw ibotar ang mga kandidatong nalambigit sa korapsyon

Nanawagan si Ombudsman Conchita Carpio-Morales sa katawhan nga dili gayud ibotar sa nagsingabot nga lokal ug nasudnong piniliay ang mga kandidatong nalambigit sa korapsyon.

Matud pa ni Morales nga kinahanglang magpagawas og plataporma ang mga kandidato kun unsaon nila pagbatok sa korapsyon.

Giangkon usab ni Morales nga daghang kawani sa gobyerno ang nag-atubang og mga reklamo kalabot sa korapsyon, ilabi na sa local government units (LGUs).

Apan giingong seryoso ug pursigedo man si Presidente Benigno ‘Noynoy’ Aquino III sa pagduso sa iyang kampanya batok sa korapsyon.

Kalabot niini, gipasalamatan sa Malakanyang ang pag-ila sa Ombudsman sa pagpursige ni PNoy sa iyang anti-corruption campaign.

Matud pa ni Presidential Communications O­perations Office (PCOO) Kalihim Herminio Coloma Jr., gidayeg usab sa Malakanyang ang integridad sa Ombudsman ug pagpaningkamot niining mapatuman ang accountability sa mga public officials. (PIA)