Sa Comval: Kapin P251 Milyones proyektong Road Concreting para sa uma trabahoon sa 2016

Compostela Valley Province--- Sa tuig 2016 trabahoon ug paningkamotang mahuman sa labing daling panahon ang mokabat unom ka mga proyektong Road Concreting sa mga kadalanan sa Comval nga nagsumpay sa uma paingon sa baligyaanan kon “Farm to Market Roads(FMR)” nga apil sa mga dagkong tabang sa probinsiya nga gibubo ni Pangulong Benigno S. Aquino III pinaagi sa DA ilalom sa “Philippine Rural Development Program (PRDP)” nga kabahin sa padayong mga paningkamot sa Rebuilding and Recovery nga hugtanong gipatuman sa liderato sa probinsiya sa pagpanguna nila ni Gov. Arturo “Chiongkee” Uy, Vice Gov. Manuel “Way Kurat” Zamora, Senior Board Member Tyron Uy, ug SP Members.

Labing bag-ong report sa Provincial Planning and Development Office sa pagpanguna ni PPDO Chief Mr.Romeo Celeste nagtug-an sa unom ka mga proyektong Road Concreting sa Comval Province nga trabahoon ug paningkamotang mahuman sa tuig 2016 nga mao ang 11.74 KM nga Pangutosan, Nabunturan-Alegria,Compostela FMR sa kantidad nga  P109,577,000.00; ang 5.10564 KM. nga Nuevo Iloco FMR sa Mawab-P53.22 Milyones; ang 2.02 KM nga Kidawa FMR sa Laak-P40.675 Milyones; ang 1.54 KM nga Maragusan FMR -13.675 Milyones; ang 1.565 KM nga Napnapan FMR sa Pantukan-P15.203 Milyones; ug laing 2.536 KM nga Upper Pangasinan FMR sa Pantukan gihapon-P19.173 Milyones.

Sa pagsalmot sa probinsiya sa kanhi Mindanao Rural Development Program (MRDP) nga karon mao na ang mas gipalapad nga Philippine Rural Development Program(PRDP) ni Pangulong Benigno S. Aquino-III, adunay unang unom ka proposed PRDP I BUILD Sub-Projects sa Comval Province nga daling naaprobahan ug maoy pinakadako niining mga proyektoha ang gipangayong Concreting sa Pangutosan, Nabunturan-New Alegria, Compostela Farm to Market Road(FMR).

Kining mga proyektoha apil sa mga labing mahinungdanong butang nga gihisgotan atol sa PRDP-PPMIU Organization Meeting nga gipanguluhan ni PPDO Chief Mr. Romeo Celeste, ang natudlong PPMIU Head sa PRDP-Provincial Program Management and Implementing Unit (PPMIU) sa Comval nga gimugna ni Gov. Uy ilalom sa Executive Order no.033-2014. (Gilbert Cabahug, PGO-IDS)