Sen. Bam Aquino: Kabatan-onan aduna nay igong katakos paghimo sa mapuslanong mga butang

Compostela Valley Province – Aduna nay igong katakos, ug gibuhat na sa mga kabatan-onan ang mapuslanong mga butang nga dakog nahimo sa gitinguhang kauswagan ug kalamboan sa nasud, ug matud sa pinakabatan-ong senador sa 16^th Congress nga si Sen. Paulo Benigno  “Bam” Aguirre Aquino IV nga ang mga kabatan-onan kanunay gyod nga misalmot sa mga buluntaryong kalihokan ug sa matag-karon ug unya anaa sila nga nagpaambit sa ilang oras ug mga talento  diha sa Community.

Si Sen. Bam Aquino maoy pinasidunggang mamumulong sa usa ka adlawng selebrasyon sa Bulawanong Kabatan-onan (Youth Day) diha sa kapitolyo niadtong Marso 6 nga mao ang ikalimang adlaw sa usa ka semanang selebrasyon sa 8^th Bulawan Festival ug 17^th Founding Anniversary sa Compostela Valley nga gidumala  sa liderato sa probinsiya sa pagpanguna nila ni Gov. Arturo “Chiongkee” Uy, Vice Gov. Manuel “Way kurat” Zamora ug 8^th Bulawan Action Officer Senior Board Member Tyron Uy.

Apil sa mga mitambong niini sila  Congw. Maricar Zamora ug SP Members Raul Timogtimog, Cesar Richa, Atty. Ruwell Peter Gonzaga, Augusto Blanco Jr., Randy Opisan, ug uban pa.

Sa pag-introduce ni Tyron  sa Keynote Speaker, iyang gisulti nga si Sen. Bam Aquino adunay taas kaayong scholastic record tungod siya migradwar nga class valedictorian ug Summa Cum Laude sa kursong Management Engineering didto sa Ateneo de Manila University. Gisulti sad ni Tyron nga si Sen. Bam Aquino mao ang pinakabata nga natudlong head sa ahensiya sa gobyerno tungod sa edad nga 25 anyos pa lang siya maoy natudlong Chairperson sa National Youth Commission.

Sa tuig 2008 napili siya nga eskolar sa “Executive Education Program on Public Policy and Leadership” sa Harvard University Kennedy School of Government sa America, ug tungod sa maayo niyang nabuhat sa public service delivery siya giila ug gipasidunggan nga “Young Global Leader of the World Economic Forum” sa tuig 2006, usa sa Ten Outstanding Young Men sa 2010, ug usa sa giilang Ten Outstanding Young Person  of the World sa milabayng 2012.

Si Sen. Bam Aquino maoy usa sa mga labing mahinungdanong personalidad nga nahimong maestro ni Tyron niadtong milabayng tuig panahon sa pipila ka bulang mga pagbansay sa “Leadership Academy” didto sa Ateneo de Manila University kauban ang mga piniling Local Legislators sa nasud. (Gilbert Cabahug/ IDS Comval)