Bagyo, taman signal no. 5 na

Nidesider na ang Philippine Atmospheric, Geophysical and Astrono­mical Services Admi­nis­tration (PAGASA) nga dugangan og taman Signal number 5 ang kasamtangang signals sa bagyo nga taman number 4 lamang ang gigamit sa paghatag og pasidaan sa publiko kun may kalamidad sa atong nasud.

Matud pa sa PAGASA, opis­yal nang gamiton sa ahensiya ang taman Signal number 5 kun  ang bagyo usa  ka super typhoon nga may gikosgon nga hangin nga molapas sa 220 kilometro matag oras.

Susama niini ang niaging bagyong Yolanda nga usa  ka super typhoon nga may gikosgon nga hangin`g mikabat sa 235 taman 275  kilometro matag oras.

Padayon pang gamiton sa PAGASA ang public storm warning signal hangtud number 4 nga na-adopt niadtong tuig 1997 ug gi-revised niadtong tuig 2010.

Gipasabot sa PAGASA nga Signal number 1, kun may gikosgon nga hangin`g mokabat sa 30-60 kilometro matag oras; Signal 2, kun  61-100 kph; Signal 3, kun 101-185 kph; ug Signal 4, kun  kapin sa 185 kph. (PIA)