PCA, magmugna og multi-sectoral advisory council nga motuki sa coco levy assets

Magmugna ang Philippine Coconut Authority (PCA) og usa ka multi-sectoral advisory council nga mohimo og rekomendasyon para sa implementasyon ni Presidente Benigno ‘Noynoy’ Aquino III pinaagi sa duha  ka executive orders kalabot sa gi-planong privatization sa coco levy assets.

Matud pa ni Presidential Communications Operations Office (PCOO) Sec. Sonny Coloma, Jr. nga nakakuha siya og pamahayag gikan ni Presidential Assistant for Food Security and Agricultural Modernization Francis Pangilinan, kinsa miingon nga ang PCA motubag sa mga kabalaka sa mga mag-uuma.

Gikataho nga daghang coconut farmer organizations ang ni-kuwestiyon sa mga bag-ong executive orders nga gipagawas sa Presidente diin matud pa nga ang maong mga mando wala misubay sa nahisgotan sa niaging konsultasyon ug may mga pangutana ang mga mag-uuma sa planong privatization sa coco levy assets.

Sa niaging semana, gipagawas ni PNoy ang Executive Orders 179 ug 180 kalabot sa inventory ug privatization sa coco levy assets.

Ang maong mando nagtakda usab og sumbanan o guidelines alang sa pagpagula ug sa paggamit sa coco levy assets. (PIA)