Comval Blood Bank humanon sa P7 Milyones nga gihatag ni Congw. Maricar Zamora

Compostela Valley Province – Tungod sa dugang P7Milyones nga gihatag ni Congw. Maricar Zamora gikan sa iyang Congressional Funds sa Distrito-2 mahuman gyod sa dili madugay ang usa ka Blood Bank Building nga nasugdan pagtukod sa probinsiya diha sa kapitolyo gamit ang P5 Milyones nga gihatag sa DOH, ug matud ni Gov. Arturo “Chiongkee” Uy nga kon mamahimo nang operational ang Blood Bank sa Comval Province dili na maglisud ug mamahimong sayon na lang sa mga taga Comval nga dunay mga pasyente nga nagkinahanglan og Dugo diha sa mga Hospital nga makakuha niini.

Gisulti kini sa gobernador atubangan sa mga bisita, sa mga dagkong opisyal sa probinsiya ug mga kalungsuran, ug sa liboang Brgy. Health Workers (BHW), Brgy. Nutrition Scholars, Day Care Workers ug sa uban pang mga Brgy. Functionaries nga ngatapok diha sa kapitolyo atol sa Social Services Day nga gisaulog usab sa probinsiya sa  ikaupat ka adlawng selebrasyon sa 8^th Bulawan Festival ug 17^th Founding  Anniversary sa Comval niadtong Marso 5,2015.   

Kauban ni Gov. Uy nga nangulo sa usa ka adlawng selebrasyon sila Vice Gov. Manuel “Way Kurat” Zamora , Senior Board Member Tyron Uy, Congw. Maricar Zamora, ug ang Keynote Speaker sa usa ka adlawng selebrasyon nga si DSWD Undersecretary Angelita G. Medel nga maoy mihatag sa mensahe ni DSWD Secretary Dinky Soliman.

Ilang kauban nga mitambong sa usa ka adlawng selebrasyon sila DSWD Region XI Dir. Prescilla Razon; Mayor Eutropio Jayectin sa Montevista; Mayor Lema Bolo sa Compostela; PHO Chief Dr. Renato Basañez; ug sila SP Members Raul Timogtimog, Atty. Ruwell   Peter Gonzaga, Ramil Gentugaya, Randy Opisan, Joseph Jaoud, ug uban pa.

Gisulti ni Gov. Uy panahon sa paghatag sa iyang Inspiring Message nga sulod na sa walo ka tuig ang Comval Province maoy nag-unang probinsiya sa nasud nga nakahatag sa pinakadaghang supply sa dugo sa kada tuig nga nakatabang sa liboang mga pasyente gikan sa probinsiya ug sa sikbit nga mga lugar sa Davao Region.

Gani matud pa niya nga sa milabayang semana iyang gidawat atol sa “Gawad Kalusugan Awarding Ceremonies” ang iyang “7^thHall of Fame Award” sa National Sandugo nga gitunol sa Malacañang pinaagi sa Department of Health (DOH). (gilbert cabahug/ids comval)