Gobyerno, MILF magpabilin sa kaakuhan sa kalinaw, matud sa opisyal sa Palasyo

Ang gobyerno sa Pilipinas ug ang Moro Islamic Liberation Front (MILF) magpabilin sa ilang mga kaakuhan sa proseso sa kalinaw, ingon man, magpadayon nga maglig-on sa kumpiyansa sa usag-usa.

"Sa atong nahibaw-an, ang duruha magpadayon paghimo’g mga lakang, aron manumbalik ang kumpiyansa sa usag-usa ug maseguro nga madawat ang Bangsamoro Basic Law (BBL) ug mapalabang kini sa panahon nga nahan-ay sa mga liderato sa parehong Taas ug Ubos nga Balay Balaoranan,” si Communication Secretary Herminio Coloma, Jr., miingon.

Matud pa ni Coloma, "Ang gobyerno magpabiling hugot sa kaakuhan sa malungtarong kalinaw, nga gitukod sa pundasyon sa kumpiyansa sa usag-usa.”

Segun sa mga taho, si MILF Chairman Al Haj Murad, miingon karong bag-o nga ang kumpiyansa tali sa gobyerno ug MILF naapektohan sa mangilngig nga insidente sa Mamasapano sa milabay nga Enero.

Matud pa usab sa taho, si Murad miingon nga ang politikanhong capital sa Presidente mikunhod ug nga aduna’y posibilidad nga dili mapalabang ang BBL sa panahon nga ilang gusto, agi’g resulta sa maong insidente. (PIA)