P30 milyones nga DepEd Building sa Comval gi-Turn-Over sa World Teacher’s Day

Compostela Valley Province - Giturn-over na ngadto sa Department of Education ang bag-o nahumang P30 Milyones nga Division Office Building sa Comval DepEd nga natukod diha sa Capitol Compound, ug  mismong si Gov. Arturo “Chiongkee” Uy  maoy nangulo sa malampusong Turn-over Ceremony sa giilang usa sa pinakadako ug pinakamodernong DepEd Building nga maoy Highlight sa gihimong pagpakigduyog sa liderato sa probinsiya ngadto sa  kapin kon kulang 5,700 magtutudlo nga misalmot sa labing dakong selebrasyon sa “World Teachers Day” niadtong Okobre 5,2014.

Matud ni Vice Gov. Manuel “Way Kurat” Zamora, nga  sa bag-o nahumang DepEd Building sa Comval ang probinsiya nakagasto ug P20milyones sa estraktura lang. Samtang, sa DepEd nagagikan ang P10milyones nga gidugang sa pagtukod niini. Dugang gasto sa probinsiya ang  P1.9 milyones alang sa airconditioning ug laing P3milyones nga nagasto gihapon sa probinsiya alang sa mga bag-ong furniture and fixtures nga naglakip sa mga bag-ong lamesa ug mga bag-ong lingkoranan.

Sa pagtunol sa bag-o nahumang 1^st Class Division Office Building maoy kauban ni Gov. Uy sila  DepEd Region XI Dir. Nenita Lumaad; Vice Gov. YK; Senior Board Member Tyron Uy;  1^st Dist Cong. Maricar Zamora; Schools Division Superintendent Dr. Dee D. Silva; ug SP Members Raul Timogtimog, Macario Humol, ug Ramil Gentugaya. Samtang si DepEd Region XI Quality Assurance Division Chief Dr. Reynante Solitario ang maoy nagpabati sa mensahe ni DepEd Secretary Brother Armin Luistro.

Apil sad sa mga mitambong ang mga dagkong opisyal sa DepEd nga sila ASDS Josie Bolofer, Education Supervisor Ruben Reponte, Education Program Supervisors ug  Coordinators, District Supervisors, School Principals, ug mga magtutudlo.

Ang usa ka adlawng selebrasyon gisugdan sa Fitness Hour ug Zumbalympics nianang sayong sa buntag, ug nagsunod dayon ang Cutting of Ribbon ug Ceremonial turn-over sa usa ka bag-o ug giilang usa sa pinakadako ug pinakamodernong DepEd Building sa nasud.

Human niini adunay Santos nga Misa nga giselebrar nila ni Rev. Fr. Tom Avila ug Rev. Fr. Edgardo Bonghanoy.

Apan maoy naghimo sa tibuok kapitolyo nga labing malipayon ug mabulokong adlaw alang sa mga magtutudlo ang gihimo nilang Gurolympics Championship Games, ang makalingawng engkwentro sa mga Larong Pinoy, ug ang Healthy Lifestyle and Beauty Care nga diin ang liderato sa probinsiya midalit ngadto sa mga magtutudlo sa libreng masahe, sa libreng gupit ug putol sa buhok, sa libreng nail care services ug uban pang mga pagpaguwapa. (gilbert cabahug/ids comval)