CVPH Montevista Doctors, uban pa, nag donar ug ambulansya

Compostela Valley Province-- Apil sad ang mga health care services provider sa CVPH Montevista nga gilangkoban sa mga Doctor, Nurses, Medtechs, Midwives, ug mga Office Personnels sa mga natakdan sa pagka manggihatagon ni Gov. Arturo “Chiongkee” Uy,  hinungdan nga bisan sila nag-amotay ug milihok aron makatigom ug dakong pundo nga maoy ilang gigamit pagpalit sa bag-ong Ambulansiya ug sa mga bag-ong Hospital Equipment nga ilang gi-donate sa Hospital aron mas molambo pa ang kapabilidad niini sa pagsalbar sa kinabuhi ug pagsulbad sa mga suliran sa panglawas sa mga pasyente.

Sa gihimong Regular Convocation program sa mga Empleyado niadtong Okubre 13, malipayong gidawat ni Gov. Uy ang usa ka bag-o nga Ambulansiya nga gidonar sa mga doktor ug uban pang health care services provider sa CVPH Montevista sa pagpanguna sa bag-ong Hospital Chief niini nga mao si Dr. Anthony Soberano.

Maoy nagtunol niini ngadto sa gobernador atol sa Turn-Over Ceremony sila si PEEMO Chief Dr. John Edward Coloma, Hospital Chief Dr. Anthony Soberano, ug Administrative Officer Mr. Allan Lagumbay.

Apil sad sa ilang mga gi-donate sa Hospital ang bag-ong “Endoscopy Unit” nga gamiton pag-examine sa tinai ug uban pang mga internal organs, ang mga bag-ong A-Scan ug Ophthalmologic Micorscope nga gamiton pag-examine sa mata, ang bag-ong Orthopedic Instruments nga gamiton pagtaod sa bakal nga gikinahanglan aron masumpay pagbalik ang nabaling mga bukog, ug ang usa ka C-Pap Pediatric Ventilator  nga gamiton pag-atiman sa mga batang pasyente diha sa “Intensive Care Unit (ICU).

Matud ni Dr. Sobrano nga sa pagkakaron tulo pa lang ka mga hospital sa tibuok Mindanao ang aduna nay C-PAP Pediatric Ventilator. Kining mga hospitala mao ang  Davao Doctors Hospital ug Southern Philippines Medical Hospital (SPMC) sa Davao City, ug  ang Compostela Valley Provincial Hospital sa Montervista.

Gisulti sad niya nga tungod sa bag-ong “A-Scan” ug “Ophthalmologic Microscope” nga naangkon sa CVPH Montevista, ang mga mananambal niini aduna nay igong kapabilidad nga maka-examine ug maka-opera sa mata, ug makahatag sa lain-laing klase sa Ophthalmologic Services sulod sa Hospital. (gilbert cabahug/ids comval)