7.7 bilyones pesos gipaguwa sa DBM aron matubag ang kakulangon sa classrooms

Gi aprubahan sa Department of Budget and Management (DBM) ang pagpaguwa sa 7.7 bilyones pesos nga pondo para sa Department of Education (DepEd) ug Department of Public Works and Highways (DPWH) aron matubag ang kakulangon sa lawak tunghaan sa tibuok nasud.

Mao kini ang ika tulo nga hugna sa pagpaguwa ug pondo karong tuiga gikan sa Basic Education Facilities Fund (BEFF), asa adunay gigahing 39 bilyones pesos gikan sa 2014 General Appropriations Act (GAA). 

Ang BEFF ang gamiton para sa pagpatukod, pag-ayos, pag-ilis, paghuman, sa mga eskwelahan ngadto sa mga lugar nga nakasinati ug grabeng kakulangon sa lawak tunghaan. Gamiton usab ang maong pondo alang sa pagpatukod ug mga pasilidad sa patubig ug sanitasyon, ingon usab sa pagpamalit ug mga lingkuranan, lamesa ug ubang gamit nga gi tumong para sa mga pampublikong eskwelahan. (PCOO News_090814)