LGU Panabo midugang ug 2 ka classroom; Magtutudlo, estudyante mapasalamaton

PANABO CITY, Davao del Norte – Nagpasalamat ang mga taga Barangay Tibungol sa kanunayong soporta gikan sa local nga panggamhanan sa syudad atol sa inugurasyon sa bag-ong klasrom kaniadtong Setyembre 18 ning kasamtangang tuig.

Ang kapin P1.4M nga estruktura nga gikuha sa panudlanan sa local nga panggamhanan pinaagi sa Special Education Fund kon SEF, namuntar sa sulod sa Tibungol Elementary School. Lakip niini ang duha ka klasrom nga mo okopar kapin 40 ka estudyante matag kwarto, nka window jalousie ug blackboard.

Mismo si City Administrator Ramon G. Sawan ang nanguna sa inugurasyon nga giubanan nila City Councilors Emeterio Blasé ug Ferdinand Gocon. Ang Kapitan sa barangay nga si Fernando Candol ug mga magtutudlo misaksi usab sa inugurasyon.

Matud ni Sawan nga kini ang tingoha sa syudad ilawon sa administrasyon ni Panabo City Mayor Jose L. Silvosa Sr. nga mahatagan ug maayong edukasyon ang mga estudyante pinaagi sa pagtukod ug bag-ong klasrom. Sigun pa ni Sawan nga ang edukasyon ang usa sa mga prayoridad nga proyekto ni Mayor Silvosa.

“Prayoridad sa local nga panggamhanan ang pakusgan ang edukasyon kay kini makahatag ug tubag sa atong kapobrehon. Team work ang butang nga kinahanglan natong buhaton aron magmalampuson ang proyekto,” matud ni Sawan.

Ms. Jonalyn Badua, prinsipal sa Tibungol Elementary School, nagpasalamat sa mga barangay opisyales, kaubanan sa Deped ug opisyal sa syudad sa walay puas nga soporta ilabi na sa edukasyon. Mipasalig usab si Ms. Badua nga ilang kining ampingan para mapahimuslan pa sa ubang mogamit. (Ni: Erwin Cubio – City Information Office/jmda)